தமிழன் வீதி

உற்சாகமாகத் தொடங்கியது திருப்பூர் புத்தகத் திருவிழா!

2012-01-27T14:54:00.002+05:30

அமைச்சர் எம்.எஸ்.எம்.ஆனந்தன் திறந்து வைத்தார்

திருப்பூர் மாநகரின் பண்பாட்டுத் திருவிழாவாக 9வது திருப்பூர் புத்தகக் கண்காட்சி 2012 புதனன்று உற்சாகமாகத் தொடங்கியது. மாநில இந்து சமய அறநிலை துறை அமைச்சர் எம்.எஸ்.எம்.ஆனந்தன் புத்தகக் கண்காட்சியைத் திறந்து வைத்தார்.

திருப்பூர் மங்கலம் பாதை கே.ஆர்.சி. சிட்டி சென்டரில் பிப்ரவரி 5ம் தேதி வரை மொத்தம் 12 நாட்கள் நடைபெறும் இக்கண்காட்சியின் தொடக்க விழாவுக்கு வரவேற்புக் குழுத் தலைவர் எம்.ஜீவானந்தம் தலைமை வகித்தார். செயலாளர் செ.முத்துக்கண்ணன் வரவேற்றார். இதில் மாவட்ட ஆட்சியர் மா.மதிவாணன், சைமா பொதுச் செயலாளர் எம்பரர் வீ.பொன்னுசாமி, கபாடி அறக்கட்டளை சக்தி சுப்பிரமணியம் ஆகியோர் முன்னிலை வகித்தனர்.

புத்தகக் கண்காட்சி வளாகத்தில் கானுயிர் காப்போம் என்ற கண்காட்சியை மாநகராட்சி மேயர் அ.விசாலாட்சி திறந்து வைத்தார். ஏஇபிசி அமைப்பின் தலைவர் ஏ.சக்திவேல் முதல் புத்தக விற்பனையைத் தொடங்கி வைக்க, துணை மேயர் சு.குணசேகரன் பெற்றுக் கொண்டார். இந்த விழாவில் மகிழ்ச்சிப் பெருக்கோடு ஏராளமானோர் பங்கேற்றனர். மேடை நிகழ்ச்சிக்கு முன்னதாக திருப்பூர் சிறுவர் கலைக்குழுவின் தப்பாட்டம் கலை நிகழ்ச்சி பார்வையாளர்களை வெகுவாக ஈர்த்தது.

இக்கண்காட்சியில் மொத்தம் 105 அரங்குகள் அமைக்கப்பட்டுள்ளன. தமிழகத்தின் முன்னணி புத்தகப் பதிப்பாளர்கள் மற்றும் விற்பனையாளர்கள் இதில் பங்கேற்றுள்ளனர். சென்னை புத்தகக் கண்காட்சியைத் தொடர்ந்து நடைபெறும் இக்கண்காட்சியில் அங்கு புதிதாக வெளியிடப்பட்ட புதிய புத்தகங்களும் விற்பனைக்கு வந்துள்ளன.

ஒவ்வொரு நாள் மாலையும் கலை இலக்கிய நிகழ்ச்சிகள் நடத்தப்படுகின்றன. வழக்கம் போல் திருப்பூர் நகர மக்கள் குறிப்பாக பெண்கள், குழந்தைகள் பெருமளவு இக்கண்காட்சியைக் காண வருவார்கள் என எதிர்பார்ப்பதாக புத்தகக் கண்காட்சி ஏற்பாட்டாளர்கள் தெரிவித்தனர்.

-----------------------------------------

முதல் படம் கண்காட்சியை அமைச்சர் திறந்து வைப்பது

இரண்டாவது படம் புத்தக விற்பனையைத் தொடங்கி வைப்பது

'குத்தகை' (சிறுகதை) - இரத்தின புகழேந்தி.

2012-01-14T23:52:00.002+05:30

பொங்கல் தின சிறப்பு சிறுகதை.

'களம் புதிது' தனிச்சுற்று இதழில் 1996- ஏப்ரல் மாதத்தில் வந்த சிறு கதை. வாசிக்க வாசிக்க கதை கனமாக நமது நெஞ்சில் படிந்து விடுகிறது. உழைத்த மனிதர்கள் எப்படியெல்லாம் வஞ்சிக்கப் பட்டனர் என்பதை மிக மிக எதார்த்தமாக மண் மனத்துடன் சொல்லி உள்ளார் இரெத்தின புகழேந்தி. களம் புதிது ஆசிரியர் குழுவின் தலைமை பொறுப்பும் இவர்தான். இக் கதை விருத்தாசலம் பகுதியில் நடைப்பெறுவதாக இருந்தாலும், இதில் கையாண்ட வட்டார வழக்கு சொற்கள் ஒருங்கிணைந்த தஞ்சை மாவட்டம் கும்பகோணம் மற்றும் மாயவரம் பகுதிகளில் பேசப்படுபவைதான்.

வட்டார வழக்குச் சொல்லில் வளைந்து நெளிந்து செல்லும் கதாசிரியர், கதையின் முடிவில் சாதி பெயரை கொண்டு திட்டுவது ஏனோ...மனதை நெருடுகிறது....!

நன்றி!

புகைப்படங்கள்: வைலெட் ஐஸ்.

"ஏ... முத்தம்மா சனி மூலையில போயி அற, மொதல்ல மலப்பில்லாத மளமளன்னு ஆவும் அறப்பு"

சர்ரக்...கெழக்கத்தி அருவா நாலு மொதல ஒரே அறப்பா அறுத்தது.

சர்ரக்...சர்ரக்...சர்ரக்...சர்ரக்...
சர்ரக்...சர்ரக்...சர்ரக்...சர்ரக்...

"என்னடா மாப்ள, இம்மாங் கஷ்டப்பட்டு கடசீல பொகையான் அடிக்க உட்டுட்ட"

"ஏன்யா அந்த வவுத்தரிச்சல கெளப்புற. பயிறுதான் வெளுத்து போயி இருக்கேன்னு ஒரு மூட்ட ஊரியாவ கொண்டாந்து போட்டு புட்டான். நல்லா பச்ச பசேர்னு வந்தது. திட்டு திட்டா அடிச்சி கெடாவிட்டது"

ரெண்டாவது வாட்டி போடும்போது, ஊரியா கொஞ்சனா காட்டனும்"

"புதுசா புட்டமுட்டானாம் அவன் பூ....செல்லரிச்சுதாம்..." முணுமுணுத்தாள் முத்தம்மா. இதைக் கேட்டதும் உம் என்று ஆனது குள்ளனின் முகம்.

"பொகையான் அடிச்சாலே ஒப்புடி ஆவாது. இதுல கொல்ல வாரம், தண்ணிவாரம் குடுத்து ஒனக்கு என்னா மீற போவுது."

"இதெல்லாம் கணக்கு பண்ணி பாத்துட்டுதான் அவாளு குத்தவைக்கு உட்டது. சும்மாகிம்மா உடுல."

"குள்ள பய பெரியாண்ட நெலத்த கெரையம் வாங்குனவனாட்டம் பள்ளம் மேடு திருத்தறது என்ன, எருவு அடிக்கறது என்னா..."

ஆளுக்கு ஒன்றை சொல்லி குள்ளனின் வயிற்றெரிச்சலை கிளப்பினார்கள்.

0000

"நன்னானே நானே னன்னே
நானனன்னே நன்னா னனே...
கோத்தா கொடி பவழம்
கோருவைக்கே நப்பவழம்
கோப்பாரு இல்லாமலே- நான்
கொடி பழம் சிந்துறனே (நன்னானே....)"

    முத்தம்ம பாட நடவு சனங்கள் பின் பாட்டுப் பாட வடக்கு வேளி முழுக்க எதிரொலித்தது. பாட்டுக்குத் தாளம் போடுவது போல ச்சளக்...ச்சளக்...ச்சளக்... பயிரை சேற்றில் நட்டனர். சொந்த நடவு என்பதால் நெருக்கி நட்டனர். தார்க்குச்சியை குத்தியது போல குத்திட்டு நின்றது பயிர்.

     " நீங்கள்ளாம் இம்மாம் கத்திருக்கிங்க புள்ள....ம்...எங்க கொல்லன்னா சாச்சி போட்டு எட்ட எட்ட நடுறது.   சொந்த நடுவுன்னதும் அஞ்சி வெரலும் சேத்துல போவுத!"    சத்தம் போட்டான் அந்த வழியா வந்த கொடுமனூராங்க மகன்.

"ஒங்களுக்கு மட்டும் என்னா வேற கையாலயா நட்டோம். பாக்கிறதுக்குதான் அதேமேரி தெரியும். கடசீல ஒங்களுக்குதான் நெல்லா வெளையும்."

"ஆமாம்...ஆமாம்...கவுடு வச்சி வேல செஞ்சிங்கன்னா எல்லாங் கட்டாந்தரையாத்தான் போவும்..."

"இங்க ரெண்டு முடி நாத்து எடுத்துகிட்டு வா மாமோய்...."

"கையால ஆவாத கலவட....என்னாடி இன்னும் பின்னாலயே கெடக்குற?" கிண்டலடித்தப்படி நாற்று முடிகளைக் கொண்டு போனான் குள்ளன். அவனை உள்ளே வைத்து வெளியில் நடவு நட்டுவிட்டனர். இப்படி நட்டுவிட்டால் காசு கொடுத்து விட்டுத்தான் வெளியில் வரவேண்டும். கையில் காசு இல்லையென்றாலும் எது அவனிடம் இருக்கிறதோ அதை பிடிங்கிக் கொள்வார்கள். பிறகு காசு கொடுத்துவிட்டு பொருளை வாங்கிக் கொள்ள வேண்டும்.

"என்னா சொன்ன...கலவடையாமில்ல...." சிரித்துக் கொண்டே குள்ளனின் பின் பக்கக் கோவணத்தை அவிழ்த்து விட்டாள் கருப்பாயி.

   பொத்துக் கொண்டு பீரிட்டு அடித்தது சிரிப்பொலி, தொங்கிய கோவணத்தை முன் பக்கம் கெட்டியாக அழுத்தி பிடித்துக் கொண்டு "ச்சீ...கையில காசு இல்ல ...ஊட்ட வந்து தரன் உடுங்களன் மானங்கெட்ட கழுதை வோள..." முண்டாசை அவிழ்த்துக் கொடுத்தான் ஏசியபடி.

"ஊட்ட வந்து ஏமாத்தி புட்ட அங்க சுத்தமா அவுத்து உட்டுடுவன்"

இவர்களின் சேட்டைகளுக்கு எரிச்சலடைபவன் போல காட்டிக் கொண்டாலும் உள்ளுக்குள் குள்ளனுக்கு ஒரு விதத்தில் மகிழ்ச்சி. ஆண்டைகளுக்கு கிடைத்த அனுபவம் முதன் முதலாக அவனுக்குக் கிடைத்திருக்கிறது.

நிலம் குத்தகைக்கு விடுவது தெரிந்து பெரியாண்டை வீட்டின் முன் கூனி குறுகி நின்றான் குள்ளன்.

"தெக்குத் தெருவானுவோளுக்கு வேலைக்கு போறவன், குத்துவைக்கு உடுறாங்கன்னதும் கொழஞ்சிகிட்டு வந்து நிக்கிறதப்பாரு. சும்மாவா சொன்னாங்க கள்ளன நம்புனாலும் குள்ளன நம்பக் கூடாதுன்னு..." பெரியாண்டையின் பேச்சு ஊசியாய் தைத்தது குள்ளனுக்கு.

"இல்லிங்க... " தயங்கி, பயந்து, நடுங்கி, பவ்யமாய், வாய்பொத்தி, தலை சொரிந்து, கூனியபடி சொன்னான்.

இந்த ஒணக்க ஓட்டு போடும் போது மட்டும் இருக்கட்டும். மாத்தி கீத்தி போட்டிங்கன்னு தெரிஞ்சிது...." கர்ச்சித்தார்.

   "எம் மூனு புள்ள மேல சத்தியமா நம்பள தவற மாத்தமில்லிங்க...உண்ட ஊட்டுக்கு ரெண்டகம் பண்ண மாட்டாங்க இந்த குள்ளன். "

நல்ல பேச கத்துகிட்டிங்கடா ...சரி...சரி...அந்த மோட்டு ஓரத்து கொல்லையை நட்டுக்க. "

   "ஏரு...கெராக்கியா இருக்குங்க....நம்ப வண்டி..."

   "வண்டியா...ரேட் தெரியுமில்ல...? நானூத்தி இருவத்தஞ்சி "

     ஆண்ட நீங்க பார்த்து சொன்னா சரிதான்...."

0000

"அடியோட அறங்கப்பா... வைக்கலாவுது நாலு தெர ஆவுட்டும்"

"வைக்க மட்டும் எங்கேருந்து ஆவும்ங்குற...கூளாந்தான் ஆவும்".

"வீசும் ஒன்ரை மூட்டையாவது தேறுமா...அநியாயமா இருக்க...." முத்தம்மாவின் வாயை கிண்டினாள் மூக்காயி.

" இந்த குள்ள பயதாண்டி பயிறுக்கு தீம்பா இருந்துட்டான். கொண்டாடி குட்டிச் சாத்தின்னு தாலிய வாங்கிகிட்டு போயி வச்சில்ல ஊரியா வாங்கிகிட்டு வந்து போடுறான். ஆனமுட்டும் சொல்லி பாத்தண்டி ஆயி....கேக்க மாட்டன்னுட்டானே. ஒரே முட்டா அடிச்சி கொட்டிக்கலாம்னு ஆச....அதான் ஒன்னுமில்லாம பூடுச்சி..."

இந்த ஊரியா வாங்க பட்டபாடு குள்ளனுக்குத்தான் தெரியும். குறுக்கு ரோட்டுல ஒரு கடையிலியும் இல்லன்னுட்டானுவோ விருத்தாலத்து ஒடயான் கடையில கேட்டா செட்டியாரு கடையில் இருக்குங்குறான், செட்டிய கேட்டா ஒடையார் கடையில இருக்குங்குறான்.

"அஞ்சாறு பேரு சேந்துகிட்டு கடகாரங்கிட்ட சண்டைக்கு போயிட்டாங்க. வேற வழி இல்லாம டோக்கன குடுத்து ஊரியா வாங்க வந்தவங்கள வரிசையில நிக்க வச்சிட்டான். உள்ள போறவங்கள்ட்ட பொட்டாஷ் வாங்குனாதான் ஊரியா தருவேங்குறான். அதுவும் மூட்ட எரனூத்தி இருவத்தஞ்சி ரூவாயாம். பில் சீட்டும் குடுக்கல".

" நூத்தி எழுவது ருவா வித்தப்பயே ரெண்டு மூட்ட வாங்கியிருக்கலாம். என்னா பண்றது....கையிலியா வச்சிருக்கோம்....பிச்ச எடுக்குமாம் பெருமாளு அத புடிங்கி திங்குமாம் அனுமாருன்னு.... நூறு அம்பதுன்னு பொருக்கி பொணச்சில்ல வாங்குறதா இருக்கு".

...ம்.... இந்த பயிர கண்ணால பாக்க எம்மாஞ் சிருப்பா சிரிச்சேன்.

அண்ட வெட்டும்போது கால வெட்டிக்கிட்டு காயத்தோடயே தழ கழிச்சி தூக்க முடியாம தூக்கிகிட்டுவந்து காலாலயே மிரிச்சி காயத்துல சேரு பூந்து பொட சச்சி லோக்கல்ல போயி கெடந்து காயத்த ஆத்திகிட்டு வந்தா கள மண்டிபோயி அத அரிச்சன்.

அடிச்ச பூச்சி மருந்து கொஞ்சமா நஞ்சமா,,,மருந்து அடிக்கும் போது சோல கிழிச்சி ரெத்தம் கசயும் அதுல மருந்து பட்டா எ

அடிச்ச பூச்சி மருந்து கொஞ்சமா நஞ்சமா....மருந்து அடிக்கும் போது சோல கிழிச்சி ரெத்தம் கசயும் அதுல மருந்து பட்டா நெருப்ப வச்சாபல எரியும். நாத்தம் வேற கொடல புடுங்கும். ரெண்டு நாள் சென்னு போய் பாத்தா சுருட்டிக்கிட்டு இருக்குற சோலையில புழுவு நெளியுது. என்னாய்யா மருந்து குடுத்தன்னு கடகாரன கேட்டா முழுங்கி (மூங்கிள்) மெலாரால சேலைய கிழிச்சிட்டு அடிக்குனுங்குறான். இனிமே....புழுவ புடிச்சி மருத்துல போட்டாதான் சாவும்னு சொன்னாலும் சொல்லுவான்.

0000

   கட்டு தூக்கும்போது காத்தாட்டம் லெக்காதான் இருந்தது. செத்த நாழியில களத்துக்கு போயி சேந்தது. கெடாவடி ஒதரும் போதே கூளான் பறந்தது.

தாளு அடிக்க பெரியாண்ட டிரக்கு வந்தது டயர் வண்டியோட. பின்னாலயே தலையில துண்ட போட்டுகிட்டு பெரியாண்டயும் வந்துட்டாரு.

புளிய மரத்தடியில் நின்னுகிட்டு

"ஓரம் பாரம் கெடக்குற தாள அள்ளி உள்ள போடுங்கடா"
...    ...   ...   ...   ...

"வண்டிய நிறுத்திட்டு, நடுல முட்டா கெடக்கு பாரு...நெறவி உடு"
...   ...     ...   ...

"ம்....போதும் நிறுத்து. ஒதறிட்டு அப்புறம் அடிக்கலாம்."
... .... ... ... ...

"நெல்லா அடிகாண ஒதறு"

"என்னடா குள்ள பயல வைக்கலாம் கூழ் கூழா பொயிட்டது...?"
....      ....        .....    ....

சும்மா ரெண்டு சுத்து சுத்து போதும்"
....      ....        .....    ....

நெல்லா வைக்கல நெல்லு இல்லாம சிலுக்க ஒதறு"
....      ....        .....    ....

போர கெழக்கால போடு காத்த மறைக்காம, ஒருத்தம் போருல நில்லு"
...      ....        .....    ....

"நெல்ல ரெண்டு முட்டாக்கிக்க"
....      ....        .....    ....

"பாதி நெல்ல தெக்க தள்ளு, பாதிய வடக்க முட்டாக்கு. பிரி வச்சி தள்ளு"

....      ....        .....    ....
....      ....        .....    ....

"வெளக்க மாத்த எடுத்து கூட்டம்புள்ள. வேடிக்க பாத்துகிட்டு நிக்குற....?"
....      ....        .....    ....

இன்னமுட்டும் அடி அடின்னு அடிச்சது. இப்ப காத்தயே காணும்"

....      ....        .....    ....

"மூட்டம் போடுங்க....ஏய் கருக்கால அள்ளி போடுறா...ம் ....இப்ப அள்ளிபோடு கூளான. பத்தவையி"

....      ....        .....    ....

"போரையான உட சொல்லு, அவந்தான் வாட்டபிலி நெல்லா உடுவான் மேல காத்துதான் அடிக்குது.....உடு..."

....      ....        .....    ....

மொறத்தால விசுறு, நெல்லா...கூளான் போறாபல விசுறு"

....      ....        .....    ....

"இந்தா குள்ளம் பொண்டாட்டி...சாக்க எடுத்து தலையில போட்டுகிட்டு கட்டிய தள்ளு"

....      ....        .....    ....

"உடு....உடு....உடு...கிடுகிடுன்னு அள்ளி உடு...."

....      ....        .....    ....
"மிம்மாரிய கழிச்சி உடு"
....      ....        .....    ....
"நெல்லா ஒட்ட கழி...."
....      ....        .....    ....

"ம்...கருன வையி"

....      ....        .....    ....
"அந்த அரவா, காவா நெல்ல அள்ளி தனியா கொட்டு"
....      ....        .....    ....

"காத்து அடிக்குது பாரு வாரி உடு...வாரி உடு...."

....      ....        .....    ....
என்னடா....குள்ளா...இருவது மூட்டையாவது தேறுமா....?"

"பொகையான் அடிச்சிட்டுதுங்க பெரியாண்ட...."
"யூரியாவ திட்ட மட்டமா போடுனும்...மின்னபின்ன செத்திருந்தால்ல சுடுகாட்டுக்கு வழி தெரியும்"

....      ....        .....    ....

"இன்னும் ஒரு தரம் மிம்மாரிய கழிங்கடா...."
....      ....        .....    ....
"சுருண வச்சதோட கழிச்சிங்கள...?"
....      ....        .....    ....
"தா...சாணி கெடக்கு பாரு புள்ளியாரு புடிச்சி ஒரு அருவம் பில்ல சொருவு....சனி மூலையில வையி"
....      ....        .....    ....

"பரைய எடுத்து அள"

"குள்ளன் அளக்க அளக்க ஒவ்வொரு பரைக்கும் ஒரு குத்து நெல்லை அள்ளி எண்ணிக்கைக்காக வைத்தாள் முத்தம்மா.

சாக்குகள் நிரம்ப நிரம்ப பட்டரை காலியானது. குள்ளனின் நெஞ்சில் உலக்கை போட்டு இடித்தது.

நெற்குவியல்களை எண்ணிப் பார்த்துவிட்டு "கொல்ல வாரம் எட்டு மூட்டை, தண்ணிவாரம் பத்து மூட்ட, வண்டி வாடக ரெண்டு மூட்ட சரிதான...?" என்றார்.

"ரெண்டு மூட்டயாவது உட்டு குடுங்க பெரியாண்ட. அடுத்த போவத்துல சேத்து குடுத்துடுறன்"

"என்னா மசுருக்குடா... ஒனக்கு குத்துவைக்கு உட்டதுக்கு தெண்டம....?"

"பொகையான் அடிச்சிட்டுதுங்க ....எனக்கு ஒன்னும் மீறலன்னாலும்....கூலி நெல்லாவது உட்டுகுடுங்க சாமி"

"அன்னிக்கே பேசிதாண்ட உட்டன். நீ கூலிதாங் குடு எதாவது செய்யி. நான் என்னமோ ஒன்ன ஏமாத்தி வாங்கிகிட்டு போறாபல பேசுகிறிய...ஒன்னுகிட்ட குத்துவைக்கி உட்டம் பாரு ஏம் புத்திய செருப்பால அடிக்கனும்டா"

"அய்யய்யோ....ஏங்கசாமி பெரிய வாத்தையெல்லாம் பேசுறிங்க...நீங்க நெல்லா இருப்பிங்க, நீங்களே கொண்டுகிட்டு போயி சாப்புடுங்க...."

"அடி....செருப்பால...பற தேவடியா...."

"என்ன ஏன் அடிக்கனும்....கையால ஆவாதவன்லாம் எதுக்குடா பயிறு வைக்கனும் அவன அடிங்க..."

"இந்த பறக் கழுதைகிட்ட என்னாடா பேச்சு....நெல்ல ஏத்திகிட்டு வாங்கடா"
துண்டை உதறி தோளில் போட்டுக் கொண்டு கிளம்பினார் பெரியாண்டை.

"குள்ள சாடு மாறி...வெக்குனவ(ம்) வெளாம்பழத்த தின்னமேரி நிக்குறாம் பாரு"

....நஞ்ச தின்னவன...பொறம்போக்கு மரத்தபாத்து நாணுக்கியண்டா....த்தூ....!

                                                                               0000

மதம் மாறினால் பொங்கல் கொண்டாடக் கூடாதா....?

2012-01-14T10:29:00.001+05:30

' மதம் மாறினால் மனமுமா மாறவேண்டும்...?'

கிருஸ்த்துவாக மதம் மாறிய எனது நன்பர் வீட்டிற்கு சென்றிருந்தேன். பொங்கல் பற்றி பேச்சு வந்தபோது, 'நாங்களெல்லாம் பொங்கல் கொண்டாடுவதில்லை' என்றார். கேட்டால் கிருத்துவ மதத்தில் பொங்கல் கொண்டாடுவது பற்றி இல்லை' என்றார்.

மூளையை மதத்திற்கு அடகு வைத்தவரை ஒரு அரை விடலாம் போல் இருந்தது. அன்னிய மதமான கிருத்துவத்தில் தமிழரின் பொங்கல் பண்டிகை எப்படி இருக்கும்....? என்று கூட அவர் சிந்திக்கவில்லை!.

கேரளாவில் மலையாள மொழி பேசும் அனைத்து மதத்தினரும் அனைத்து சாதியினரும் 'ஓணம்' பண்டிகையை கொண்டாடுகின்றனர். அங்கு மத பாகுபாட்டை யாரும் பாரம்பரிய பெருவிழாவில் காட்டுவதில்லை. கிருத்தவர்களும், முகமதியர்களும் அவரவர் முறைப்படி 'ஓணம்' கொண்டாடுகின்றனர். ஆனால் இங்கு....?

ஏற்கனவே சாதியால் மதத்தால் நெல்லிக் கனியாக சிதறிக் கிடக்கும் தமிழர்கள், தங்களது பாரம்பரியமான மரபு சார்ந்த 'தமிழர் திருநாளை' மதத்தின் அடிப்படையில் ஏன் பிரித்துப் பார்க்கவேண்டும்?.

இயற்கையோடு இணைந்து வாழ்ந்த 'ஆதி தமிழன்' தன்னை பலவகையிலும் காத்து வாழவைத்த இயற்கைக்கு நன்றி தெரிவிக்கிறான். மனிதருடன் மனிதர் தொடர்பாடலை மேற்கொள்ளுவதற்கும் இயற்கையுடன் தொடர்பாடலை நீடிப்பதற்கும், தமிழர் பயிர்வளப் பண்பாட்டிலே 'பொங்கல்' என்ற குறீயிடு தோற்றம் பெற்றதாகக் கூறப்படுகிறது.

சூரியன் இன்றி இவ் உலகம் இயங்காது என்பதை புரிந்துவைத்த தமிழன், முதல் நாளில் (பெரும் பொங்கல்) அதற்கு நன்றி சொல்கிறான். தனக்காக உழைத்து தன்னையும் குடும்பதினரையும் வாழவைக்கும் 'ஆவினங்களுக்கு' ஒரு நாள் (மாட்டு பொங்கல்), தங்களது குலத் தெய்வத்தையும், மறைந்த முன்னோர்களுக்கும் நன்றி தெரிவிக்கவே மூன்றாம் நாள் (கன்னிப் பொங்கல் அல்லது காணும் பொங்கல்) கொண்டாடுகிறான்.

தமிழர்களின் பூர்வீகத் தொழிற்நுட்ப வளர்ச்சியின் ஒரு சிறப்பார்ந்த நிலையிலே பொங்கல் தோற்றம் பெற்றது என்று கூடச் சொல்லாம். உழும் கலப்பையின் உருவாக்கம், சில்லின் சுழற்சியைப் பயன்படுத்தி மண் பாண்டங்களை உருவாக்குதல், எருதின் பலத்தை ஆற்றலாகப் பயன்படுத்தி உற்பத்தியை பெறுக்குதல் என்று 'பொங்கல்' தமிழனின் தொழிற் நுட்பத்தோடு தொடர்பு படுத்தப்பட்டுள்ளது. அதனாலயே பொங்கல் ஒரு 'Thanks Giving' பண்டிகையாகவும் பார்க்கப்படவேண்டும்.

இப்படி இயற்கைக்கு நன்றி தெரிவிக்கும் விழாவாகவே 'பொங்கல்' கொண்டாடப்பட... இதில் எங்கிருந்து வந்தது மதமும் சாதியும்? தமிழை தாய் மொழியாக கொண்ட எவரும் அவரவர் மதத்தின வழக்கப்படி பொங்கல் கொண்டாலாமே....? இதில் ஏன் தயக்கமும் வெட்கமும்?!

அனைத்து மதத்தினரும் சாதியினரும் தமிழராய் இணைந்து கொண்டாடும் பொங்கல் பெரு நாளே தமிழர் திருநாள் என்பதை ஏன் இந்த மதம் மாறிய தமிழர்கள் மறந்துவிட்டார்கள்....?

புத்தகக் காட்சியில் முதல் ரவுண்ட்!

2012-01-12T19:47:00.001+05:30

மதியம் அமிஞ்சிக்கரையில் உள்ள 'ஆற்காடு மெஸ்'ஸில் மட்டன், வஞ்சிரம் சாப்பிட்டுவிட்டு, பொறுக்க... அஜந்தா பாக்கும், 'தங்க ராஜா' வென்சுருட்டும் பற்ற வைத்து, ஆழ இழுத்து புகை விட்டபோது மணி மூன்று. இப்போ போனால் புத்தகக் காட்சிக்கு அவ்வளவாக கூட்டம் இருக்காது என்று நினைத்து பைக்கை மெல்ல உருட்ட....ஏனோ முன் வாயில் வழியாக விடாமல் 'புதிய ஆவடி சாலை வழியாக உள்ளே போங்க...' என்றார்கள்.

செயின்ட் ஜார்ஜ் பள்ளி வளாகத்தில் ...பொடியன்கள் வாலிபால் விளையாட...அருகில் விஸ்வரூபமாய் விரிந்திருந்தது 35வது சென்னை புத்தகக் காட்சி.

வாயிலில் வழி மறைத்தவரிடம் 'பிரஸ்' என்றேன். 'டோக்கன் இருக்கா அப்பு... டோக்கன்... டோக்கன்' என்று சினிமாவில் கேட்பதுபோல் என்னைப் பார்த்தார். அவரை தாண்டி நின்ற குமரன் பதிப்பக வைரவன் கை அசைக்க ... உள்ளே சென்றபோது பப்பாசி தலைவர் ஷண்முகம் நின்றுக் கொண்டு இருந்தார். அவருக்கு ஒரு சலாம் வைத்தேன். அருகில் ஷாஜகான் (யுனிவர்ஷல் பப்ளிகேஷன்ஸ்) நின்றுக் கொண்டு இருந்தார்.

"சார் எங்க... கார் பாஸ், பிரஸ் பாஸ்? " என்றேன்.

"நீங்க எங்க வந்திங்க...இப்பதான் வர்றீங்க. வந்தாதானே தர முடியும்" என்றார்.

அதுவும் வாஸ்தவம்தான்.

புத்தகக் காட்சியின் தொடக்கத்தில் தினமணிக்கும் பப்பாசிக்கும் ஒப்பத்தம் போட்டுவிட்டு விளம்பரம், ஆர்ச் மற்றும் அரங்கு   வைக்க கடிதமும் கொடுத்து...ஒப்புதலும் வாங்கிக் கொடுத்துவிட்டு, அடுத்த வேலைக்கு சென்று விட்டேன். அதனால் ஆரம்பித்து 5 நாட்கள் கழித்துதான் அங்கு செல்ல முடிந்தது. இது ஒவ்வொரு வருடமும் நடப்பதுதான். வருடா வருடம் அவர் கேட்பதுதான். "எங்கே ஆளையே காணும்...?" என்று.

சரி விடுங்கள்....இந்த வருடம் முதல் ரவுண்டில் நான் வாங்கிய புத்தகங்கள்.

1) 'கிளியோபாட்ரா'
     உலகம் வியக்கும் பேரழகியின் சர்ச்சைக்குரிய
     சரித்திரம்.
     விலை ரூ.95/-

2) 'பேய்க் கதைகளும்
     தேவதைக் கதைகளும்' - ஜெயமோகன்.
     விலை ரூ.100/-

3) 'எக்ஸைல்' - சாரு நிவேதிதா
     விலை ரூ.250/-

4) 'ராஜராஜ சோழன்' - ச.ந.கண்ணன்
     சோழ சாம்ராஜ்ஜியத்தின் கம்பீர
     அடையாளமான    ராஜராஜனின் வீர வரலாறு.
     விலை ரூ.90/-

5) ஜெயமோகன் - குறு நாவல்கள்
    விலை ரூ.200/-

மேற்கண்ட புத்தகங்கள் அனைத்தும் கிழக்கு பதிப்பக வெளியீடு (Dial for Books : 044 94459 01234 / 9445 979797). இந்த புத்தகங்கள் வாங்கியதற்கு ரூ.395/- விலையுள்ள 'Health wise Handbook' என்ற ஆங்கில புத்தகத்தை இலவசமாக தந்திருக்கிறார்கள். இது தெரியாமல் இந்தப் புத்தகம் எப்படி வந்தது என்று ரொம்ப நேரம் குழம்பிக்கொண்டு இருந்தேன். பிற்பாடு தொலைபேசியில் தொடர்புக் கொண்டு கேட்ட போதுதான் அது இலவசம் என்றார்கள். "யப்பா....சொல்லிட்டு கொடுங்கப்பா?!"

6) ஊரும் சேரியும் (கன்னட தலித் சுயசரிதை)
    - சித்தலிங்கையா
   விலை ரூ.75/-

7) 'வன்மம்'   - பாமா.
     விலை ரூ.80/-

8) காக்கை சிறகினிலே இலக்கிய மாத இதழ்.
    விலை ரூ.40/-

மேற்கண்ட புத்தகங்கள் அனைத்தும் விடியல் வெளியீடு. 'சிலிக்குயில் புத்தகப் பயணம்' அரங்கில் வாங்கியது.

9) 'கறுப்பு கிறிஸ்துவும் வெள்ளைச் சிங்கங்களும்'
        -சு.கி.ஜெயகரன்.
      வரலாற்றைச் சுமந்த மாந்தர்களின் வரலாறு.
       விலை ரூ.110/-

10) குடுகுடுப்பைக்காரர் வாழ்வியல்.
        - ந. முருகேச பாண்டியன்.
         விலை ரூ.60/-

11) 'யாமம்'
         -எஸ்.ராமகிருஷ்ணன்
         'சரித்திரத்தின் வழியே புதிர் மிகுந்த அந்தரங்கத்தின் கதை'.
       விலை ரூ.275/-

   அடுத்த ரவுண்டு நாளை....?!

இணையத்தை கலக்கும் 'யாழ்பாண கொலைவெறி' !

2012-01-10T16:54:00.002+05:30

இலங்கையைச் சேர்ந்தயாழ்ப்பாணத் தமிழர் ஜெர்ரி ஸ்டாலின் எழுத்தில், இசையில் வெளியாகியுள்ள"கொலைவெறிடா' பாடல் இணையத்தின் மூலம் பட்டி, தொட்டியெல்லாம் பிரபலமாகிவருகிறது.

முழுக்க, முழுக்க தமிழில் "யூ டியூப்பில்' வெளியாகியுள்ள"கொலைவெறிடா' பாடலை இதுவரை 1 லட்சத்து 80 ஆயிரம் பேர் கேட்டுரசித்துள்ளனர். யாழ்ப்பாணம் செயின்ட் பேட்ரிக் கல்லூரியின் முன்னாள்மாணவரான அவர் இப்போது கணினித் துறையில் பணியாற்றி வருகிறார். இசைஆர்வம்காரணமாக அவ்வப்போது சில கவிதைகளுக்கு இசைவடிவம் கொடுத்து வெளியிட்டுவருகிறார்.

அந்த வரிசையில், நடிகர் தனுஷின் "கொலைவெறி' பாடலின்அடிச்சுவடைப் பின்பற்றி ஜெர்ரி வெளியிட்டிருக்கும் "யாழ்ப்பாணத்திலிருந்துகொலைவெறிடா' பாடல் உலகம் முழுவதும் பெரும் வரவேற்பைப் பெற்றுள்ளது.

பாடலின்தொடக்கத்தில் யாழ்ப்பாணம் நகர எல்லையில் சிங்கள மொழியில்வைக்கப்பட்டிருக்கும் எழுத்துப் பலகை காண்பிக்கப்படுகிறது. அதைத்தொடர்ந்து, "என் தமிழ்மொழி மேல் உனக்கேனிந்த கொலைவெறிடா' எனத் தொடங்கும்பாடல் வரிகள் ஒரு தமிழ் இளைஞரின் கோபத்தை ஆக்ரோஷமாகக் கொப்பளிக்கிறது.

செம்மொழி போற்றும்
செந்தமிழ் நாட்டில்
தமிழிற்கேன் பஞ்சம்?
தமிழை விற்று
பதக்கம் வாங்கும்
தமிழா கேள்
கொஞ்சம்...
கம்பனின் வரிகள்...
வள்ளுவன் குறள்கள்...
பாரதி கவிகள் எங்கே?

என்றுஇந்தப் பாடலின் வழியாக 28 வயதாகும் யாழ்ப்பாணத் தமிழர் ஜெர்ரி கேட்கும்கேள்விகள் உலகத் தமிழர்களின் காதுகளில் தொடர்ந்து எதிரொலிக்கின்றன.உள்நாட்டுபோருக்குப் பின்னர் இலங்கையில் தமிழின் அடையாளம், தமிழர்களின் அடையாளம்அழிக்கப்பட்டு வரும் நிலையில் இப் பாடல் தமிழர்கள் மத்தியில் பெரும்எழுச்சியை ஏற்படுத்தியுள்ளது. அதன் காரணமாகவே தனுஷின் "கொலைவெறிடி'பாடலுக்கு இணையாகப் இந்தப் பாடலும் இணையத்தை ஆட்டிப் படைத்து வருகிறது.

நன்றி தினமணி.

இதுவல்லவோ சுயசரிதம்!

2012-01-08T09:04:00.002+05:30


நினைவு அலைகளுக்கு தினமணியில் நான் எழுதிய கட்டுரை

சதா ஓசை எழுப்பி கரையைத் தொடும் அலைகள், பார்க்க மகிழ்ச்சியாகத் தெரிந்தாலும் உண்மையில் ஆக்ரோஷம் நிறைந்தது என்பதை நாம் அறிவோம். கொஞ்சம் பிசகினாலும் நம்மை ஆக்ஷ்கரிக்கக் கூடிய ஆற்றல் அலைகளுக்கு உண்டு. அத்தகைய ஆபத்து சில புத்தகங்களுக்கும் உண்டு!. படிக்க படிக்க... அவை நம்மை சட்டென்று உள்ளே இழுத்துக் கொள்ளும். புரட்டி எடுத்து நம்மை அதன் போக்கில் கொண்டு சென்று விடும்.

அத்தகைய ஆபத்து நிறைந்தது டாக்டர் தி.சே.செள. ராஜனின் தன் வரலாறு

நூலான 'நினைவு அலைகள்'. 'பின்ன... கல்கியே இதில் மாட்டிக்கொண்டு

தப்பிக்க முடியாமல் போய்விட்டது...! என்றால் பாருங்களேன்!'.

அச்சு வடிவில் படிக்க....

1947 ஆம் ஆண்டு ஆகஸ்ட் 30 ஆம் நாள் இரவு 1 1/2 மணிக்கு வீடு திரும்பிய

'கல்கி' கிருஷ்ணமூர்த்தி மேஜை மேல் இருந்த "நினைவு அலைகள்" என்னும்

பைண்டு முடியாமல் இருந்த புத்தகத்தை எடுத்து ' முதல் பள்ளிக் கூடம்'

என்னும் முதல் கட்டுரையை படிக்க ஆரம்பித்தார், 1937இல் ராஜாஜி மந்திரி

சபையில் சுகாதார மந்திரியாகி சபை கூட்டத்திற்கு வந்ததுவரை... ராஜன்

எழுதியதை படித்து முடித்தப் போது விடியற்காலை 5 மணி. சுமார் 3 1/2

மணி நேரத்தில் 335 பக்கங்களைப் படித்துவிட்டு உடனேயே 'நினைவு அலைகள்' நூலுக்கு முன்னுரையை எழுதி கொடுத்திருக்கிறார். கல்கியின் முன்னுரையே இன் நூலுக்கான அளவையாக மாறி முன் நிற்கிறது.

பிரபல மருத்துவரான தி. சே.செள. ராஜன் மருத்துவ சேவையையே முழு மனதாகக் கொண்டவர். தனது அயராத உழைப்பினால் அயல் நாடுகளில் பணி புரிந்து, பின்னர் ராஜாஜியின் அமைச்சரவையில் சுகாதாரத் துறை அமைச்சராக திறம்பட பணியாற்றியவர். அவர் எழுதிய தன் வரலாறு கூறும் 'நினைவு அலைகள்' மீள் பதிப்பாக இப்போது சந்தியா பதிப்பகத்தாரால் வெளியீடப்பட்டுள்ளது. விலை ரூ225/-

கிட்டத்தட்ட 64 ஆண்டுகள் கழித்து ' நினைவு அலைகள்' மீள் பதிப்பாக

வெளிவரக் காரணம், அதன் தடையில்லா எழுத்தோட்டம்.

பள்ளிக் கூட வாழ்க்கையில் தொடங்கும் வரலாறு, அவரது திண்ணை பள்ளிக் கூட அனுபவம், கல்லூரி வாழ்க்கை, மருத்துவம் படித்து ராணுவ மருத்துவ மனையில் வேலைபார்த்தது, பின்னர் இங்கிலாந்தில் மருத்துவம் படிக்கச் சென்றபோது ஏற்பட்ட அனுபவம், லண்டனில் வ.வே.சு. ஐயர், வீர சாவர்க்கர்

நடத்திய இந்தியா விடுதியில் சுமார் ஒரு வருடத்திற்கு மேலாக இருந்து

தனது தொழில் படிப்பில் கவனம் செலுத்தியது, பின்னர் ஸ்ரீரங்கம் திரும்பிய

போது கடல் தாண்டிச் சென்றதால், வைதீக பிராமணர்கள் அவரை தள்ளிவைத்தது என்று அனுபவ ரேகைகள் நூல் முழுவதும் பரவிக்கிடக்கின்றது.

டாக்டர் ராஜன் இன் நூலை சுய சரிதமாக எழுதாமல் ' நினைவுத் தொகுப்பாக'

எழுதியதே இதன் வெற்றிக்கு காரணம் என்கிறார், கா.நா.சு.

டாக்டர் ராஜன் தனது நினைவு அலைகளில் மிக மெதுவாக நீந்துகிறார்.

வாசகனுக்கு புரிபடும் விதத்தில் மிக நெருக்கமாக அவனுடன் உரையாடுகிறார். புத்தகம் என்றால் இதுவல்லவா புத்தகம்?! சுயசரிதம் என்றால் இதுவல்லவா சுயசரிதம்?! எழுதியவரின் உள்ளத்தோடு நம்முடைய உள்ளமும் ஒட்டி ஒன்றாகி விடுகிறதே என்று சிலாகித்துப் பேசுகிறார் கல்கி.

மீள் பதிப்பாக வந்திருக்கும் 'நினைவு அலைகள்' நம்மை நிச்சயம் உள்ளே

இழுத்துக்கொண்டு போய்விடும்.

சென்னை புத்தகக் காட்சியில் அரங்க எண்: 94 & 95.

தொலைபேசி: 044 24896979

Email: sandhyapublications@yahoo.கம

www. sandhyapublications.com

'வந்துவிட்டது... தமிழ் நாள்காட்டி!'

2012-01-02T21:03:00.000+05:30

தமிழர் அனைவருக்கும் இத் தகவல் சேரவேண்டும் என்பதால், இந்தப் பதிவை தமிழன் வீதி மறு பிரசுரம் செய்துள்ளது. மறு பிரசுரம் செய்ய ஒப்புதல் வழங்கிய ஐயா சுப.நற்குணன், (திருத்தமிழ்)., அவர்களுக்கு எனது மனமார்ந்த நன்றிகள் பல....!

மற்ற பதிவர்களும் இதை மறு பிரசுரம் செய்து தமிழ் நாள்காட்டியை, தமிழரிடையே பரப்புவோம்.

நாள்காட்டி தோற்றம்

தமிழையும் தமிழ்ப் புத்தாண்டையும் முன்னிறுத்தி தமிழ் நாள்காட்டி வெளிவந்துள்ளது. அதுவும், மலேசியத் திருநாட்டில் ஆறாவது ஆண்டாக இந்தத் தமிழ் நாள்காட்டி வெற்றிகரமாக வெளிவருகின்றது. இந்த நாள்காட்டியைத் தமிழியல் ஆய்வுக் களம் பெருமையோடு வெளியிட்டுள்ளது.

மலேசியத் தமிழறிஞர் இர.திருச்செல்வம் இந்த நாள்காட்டியை வடிவமைப்புச் செய்துள்ளார். 2007 தொடங்கி இந்தத் தமிழ் நாள்காட்டி தொடர்ந்து வெளிவந்து தமிழர்களின் பாராட்டுகளைப் பெற்றுள்ளது.

தமிழ் நாள்காட்டி முழுமையாகத் தமிழிலேயே வெளிவந்துள்ளது. தமிழ்க்கூறு நல்லுலகத்திற்குக் கிடைத்திருக்கும் தனித்தமிழ் நாள்காட்டி என இதனைத் துணி நாள்காட்டி வரலாற்றில் இதுகாறும் கண்டிராத மாபெரும் முயற்சியாக, இந்தந்து குறிப்பிடலாம்.

2012 சனவரித் திங்கள் 14ஆம் நாள் தைப்பொங்கல் திருநாள். அன்றுதான் தமிழ்ப் புத்தாண்டும் பிறக்கவுள்ளது. இது திருவள்ளுவராண்டு 2043 ஆகும்.

தமிழ்ப் புத்தாண்டாம் தை முதல் நாளில் தொடங்குகிற இந்த நாள்காட்டியில், ஆங்கில நாள்காட்டியும் உள்ளடங்கி இருக்கிறது. ஆங்கில மாதம், நாள் ஆகியன குறிக்கப்பட்டுள்ளன. அதே வேளையில், தமிழுக்கு முன்னுரிமை கொடுத்து நாள், மாதம், திதி, இராசி, நட்சத்திரம் என எல்லாமும் (தனித்)தமிழில் குறிக்கப்பட்டுள்ளன.

எல்லா நாள்காட்டிகளிலும் வழக்கமாக இடம்பெறுகின்ற அனைத்து விவரங்களும் இதில் இடம்பெற்றுள்ளன. மலேசியச் சூழலுக்கு ஏற்ற வகையில், பொது விடுமுறைகள், மாநில விடுமுறைகள், பள்ளி விடுமுறைகள், விழா நாள்கள், சிறப்பு நாள்கள் என அனைத்தும் இடம்பெற்றுள்ளன.

நாள்காட்டியின் தனிச்சிறப்புகள்:-

1)தேதியைக் குறிக்கும் எண்கள் தமிழ் எண்களாக உள்ளன. தமிழ் எண்களை அறியாதவர்களுக்கு உதவியாக தமிழ் எண்ணின் நடுப்பகுதியில் ஆங்கில எண்ணும் குறிக்கப்பட்டுள்ளது.

2)திருவள்ளுவர் ஆண்டைப் பின்பற்றி மாதங்கள், கிழமைகள், நாட்கள் என அனைத்தும் தமிழ்ப்பெயர்களோடு அமைந்துள்ளன.

3)கிழமைகள் 7, ஓரைகள் 12 (இராசி), நாள்மீன்கள் 27 (நட்சத்திரம்), பிறைநாள்கள் 15 (திதி) முதலானவை தமிழில் குறிக்கப்பட்டுள்ளன.

4)50க்கும் மேற்பட்ட தமிழ்ச் சான்றோர்கள், அறிஞர்கள், தலைவர்கள் ஆகியோரின் பிறந்த நாள், நினைவு நாள்களோடு தமிழ் அருளாளர்களின் குருபூசை நாட்களும் குறிக்கப்பட்டுள்ளன.

5)மலேசியா, தமிழகம், தமிழீழம் உள்ளிட்ட, 30 தமிழ்ப் பெரியோர்கள் - சான்றோர்கள் - தலைவர்கள் - மாவீரர்கள் உருவப்படங்கள் இடம்பெற்றுள்ளன.

6)வரலாற்றில் மறைக்கப்பட்டு; மறக்கப்பட்டுவிட்ட தமிழர்களின் வானியல்(சோதிடக்) கலையை இந்த நாள்காட்டி சுருக்கமாக வெளிப்படுத்திக் காட்டியுள்ளது.

7)குழந்தைகளுக்குப் பெயர் சூட்டுவதற்கான எழுத்து அட்டவணை நாள்காட்டியில் பின்னிணைப்பாக வழங்கப்பட்டுள்ளது. *(கிரந்த எழுத்துகள் அறவே கலவாமல் முழுமையாகத் தமிழ் எழுத்துகளையே கொண்டிருக்கும் பெயர் எழுத்து அட்டவணை இதுவாகும்.)

8)ஐந்திரக் குறிப்பு, நாள்காட்டிப் பயன்படுத்தும் முறை, பிறைநாள்(திதி), ஓரை(இராசி), நாள்மீன்(நட்சத்திரம்) பற்றிய விளக்கங்கள் ஆகியவை இரண்டு பக்கங்களில் நாள்காட்டியின் பின்னிணைப்பாக இடம்பெற்றுள்ளன.

9)ஒவ்வொரு ஓரை(இராசி) பற்றிய படத்தோடு அதற்குரிய வேர்ச்சொல் விளக்கமும் மிகச் சுருக்கமாகக் கொடுக்கப்பட்டுள்ளது.

10)தமிழின வாழ்வியல் மூலவர்களான வள்ளுவர் வள்ளலார் ஆகிய இருவரின் உருவப்படத்தை முகப்பாகத் தாங்கி, முழு வண்ணத்தில் தரமாகவும் தமிழ் உள்ளங்களைக் கவரும் வகையிலும் இந்நாள்காட்டி அமைந்திருக்கிறது.

உள்ளத்தில் தமிழ் உணர்வும் ஊக்கமும் கொண்டு தமிழ்நலத்திற்காக முன்னின்று செயலாற்றும் தமிழ் அன்பர்களும் ஆர்வலர்களும் இந்த நாள்காட்டியை வாங்கி ஆதரவு நல்குவதோடு பரப்பும் முயற்சியிலும் துணைநிற்கலாம். எந்த ஒரு வணிக நோக்கமும் இல்லாமல் முழுக்க முழுக்க தமிழ் வளர்ச்சியை மட்டுமே இலக்காகக் கொண்டு வெளிடப்பட்டுள்ள இந்த நாள்காட்டி ஒவ்வொரு தமிழர் இல்லத்திலும் இருக்க வேண்டும்.

இது நாள்காட்டி மட்டுமல்ல; தமிழ் எண்ணியல், வானியலை மீட்டெடுக்கும் ஆவணம். தமிழர் அனைவரும் தமிழில் பெயர்ச்சூட்டிக்கொள்ள உதவும் குட்டி ஐந்திறம்(பஞ்சாங்கம்). தமிழில் இருந்து காணாமற்போன கிழமை, மாதம், திதி, இராசி, நட்சத்திரப் பெயர்களை மீட்டுக்கொடுக்கும் சுவடி. மொத்தத்தில், தமிழர் தமிழராக தமிழோடு தமிழ்வாழ்வு வாழ வழியமைத்துக் கொடுக்கும் வாழ்க்கைத் துணைநலம்.

இந்த நாள்காட்டியை அஞ்சல் வழியாகப் பெற்றுக்கொள்ள முடியும். மொத்தமாக வாங்கி விற்பனை செய்ய விரும்பும் அன்பர்களுக்கும், இந்த நாள்காட்டியை மக்களுக்குப் பரப்ப விரும்பும் அன்பர்களுக்கும் சிறப்புச் சலுகை விலையில் தரப்படும்.

நாள்காட்டி விலை: RM5.00 (ஐந்து ரிங்கிட்) மட்டுமே.

தொடர்புக்கு: தமிழியல் ஆய்வுக் களம் - Persatuan Pengajian Kesusasteraan Tamil, No.17, Lorong Merbah 2, Taman Merbah, 14300 Nibong Tebal, SPS, Pulau Pinang. Malaysia.

கைப்பேசி: ம.தமிழ்ச்செல்வன் (6013-4392016) , சுப.நற்குணன் (6017-4643941)
மின்னஞ்சல்: vellumtamil@gmail.com
திருத்தமிழ் இணையத்திற்குச் செல்ல இங்கே சொடுக்கவும்.

@சுப.நற்குணன், மலேசியா.

நன்றி: திருத்தமிழ்.

'புயலைத் தொடரும் புதிய தலைமுறை!'

2011-12-30T14:28:00.001+05:30

"தானாக வந்த 'தானே' புயலை தனதாக்கிக் கொண்ட புதிய தலைமுறை."

குறுகிய காலத்தில் முதல் இடத்திற்கு வந்த 'புதிய தலைமுறை' செய்தி சானல் 'தானே' புயலுக்கு சுற்றி சுழன்று செய்திகளை வழங்கியது. தமிழகம் முழுவதும் தனது நிருபர் படையை முடுக்கிவிட்டு புயலை கவர் செய்தது பு.த.,

நாகைமாவட்டம் தரங்கம்பாடியிலிருந்து அதன் நிருபர் ராமானுஜம் கொட்டும் மழையிலும் சுழன்று அடிக்கும் காற்றிலும், கடற்கரையோரம் நின்று கொண்டு செய்திகளை வழங்கிக் கொண்டு இருந்தார். பாவம் அவர்களால் காமிராவை அந்தப் பக்கம் இந்தப் பக்கம் திருப்பக் கூட முடியவில்லை. அப்படி ஒரு காற்று.

செய்திகளை மெரினாவில் இருந்து செய்திகளை வழங்கிக் கொண்டு இருந்த அதன் நிருபர் மதிவாணன், அடுத்த காட்சியில் கலங்கரை விளக்கிலிருந்துை வழங்கினார். காற்று அவரை அலேக்காக தூக்கிக் கொண்டு போய்விடும்போல் இருந்தது. அப்படி ஒரு வேகம். இருந்தும் 'கழகு'ப் பார்வையில் மெரீனா கடற்கரை, ஐஜி அலுவலகம் கடற்கரை சாலை என்று

அழகாகக் காட்டினார்கள். அந்த உயரத்தில், அடிக்கும் காற்றில் எப்படித்தான் பேசினார் என்று தெரியவில்லை. வெள்ளம் சூழ்ந்த மெரீனாவைப் பார்க்கும்போது சுனாமிதான் ஞாபகத்தில் வந்தது.

ஸ்டுடியோவிலிருந்து வெங்கட் மிக நேர்த்தியாக அனைவரிடமும் செய்திகளை கறந்துக் கொண்டு இருந்தார்.

இன்னொரு பக்கம் வானிலை ஆய்வு மையத்திலிருந்து ரமணனை இம்சை செய்து, வினாடிக்கு வினாடி செய்திகளை வழங்கிக் கொண்டு இருந்தார் திவ்யா. அது எத்தகைய கடினமானப் பணி என்பது நமக்கு நன்றாகவேத் தெரிகிறது.

புயல் கரையைக் கடக்கும் நேரத்தில் கடற்கரையோரம் நின்று செய்திகளை வழங்குவதென்பது மிகவும் கடினமான ஒன்றாகும். இருந்து அதை சிறப்பாகவே செய்தது புதிய தலைமுறை. இப் பணி தொடர வாழ்த்துகள்.

கொசுறு: சொட்ட சொட்ட நனைந்தப்படி செய்திகளை வழங்கிய ராமானுஜம், பின்னர் ரெயின் கோட் போட்டிருந்தார். நல்லவேளை!.

குடும்பத்தினர் எல்லோரும் ஒரே இடத்தில் கூடுவது பாதுகாப்பானதா....?

2011-12-26T18:43:00.000+05:30

"விமான பயணத்தின்போது நானும் எனது மனைவியும் சேர்ந்து பயணம் செய்வதில்லை. நான் ஒரு நாள் முன்னதாகவோ... அல்லது அடுத்தடுத்த... விமானத்திலேயோ பயணம் செய்வோம். எதாவது ஒரு அசம்பாவிதம் நடந்து எங்களில் யாராவது ஒருவர் இறந்துவிட்டால் கூட, ஒருவர் இருந்து குழந்தைகளைக் காப்பாற்றலாமே... என்பதால்தான்" என்றார் இந்தி நடிகர் அமிதாப்பச்சன்.

இந்தியாவின் புகழ் வாய்ந்த நடிகர் இப்படி சொன்னது பலரையும் ஆச்சரியப்படுத்தியது. 'என்ன அமிதாப்பச்சன் இப்படி முன்னெச்சரிக்கை முத்தண்ணாவக இருக்கிறாரே..? ' என்று நாம் கிண்டல் செய்யலாம்.!. ரெண்டு பேர் சேர்ந்து போனா என்ன உடனே செத்தாப்போயிடுவாங்க என்று கூட கேட்கலாம்?.

ஆனால், சென்னை பழவேற்காட்டில் நடந்த துயரச் சம்பவம், அவர் சொன்னது சரிதானோ என்று நினைக்கத் தோன்றியது.

21 பேரும் ஒரே இடத்தில்

முதலில் இது சாதாரண மற்றுமொரு விபத்து என்றே மக்கள் நினைத்தனர். ஆனால், நேரம் செல்ல செல்லத்தான் விஷயத்தின் விபரீதம் புரிந்தது. இறந்தது அனைவரும் ஒரே குடும்பத்தினர் என்ற போது.... தமிழகமே உறைந்து போனது!.

கிருஸ்துமஸ் (ஞாயிறு) அன்று சென்னை பழவேற்காட்டில் நடந்த சம்பவம் தமிழ் நாட்டையே அதிர்சிக்குள்ளாக்கியது. ஒரே குடும்பத்தைச் சேர்ந்த 22

பேர் நீரில் முழுகி இறந்துள்ளனர். சுந்தர பாண்டியன் அவரது மனைவி ஜெயஜோதி, அவரது ஒரு மகள், 4 மகன்கள் , அவர்களது மனைவிகள்

மற்றும் மகன் மற்றும் மகளின் குழந்தைகள் என்று மொத்த குடும்பமே பலி ஆகியிருக்கிறார்கள்.

பொதுவாக இந்த துயரச் சம்பவங்கள் விடுமுறை நாள்களில்தான் அதிகம் நடைபெறுகிறது.

விடுமுறை மற்றும் விசேஷ நாட்களில் குடும்பத்தினர் ஒரே இடத்தில் கூடி கொண்டாடுவது இயற்கையான ஒன்றுதான். ஆனால் அந்தக் கொண்டாட்டம் பாதுகாப்பானதா என்பதுதான் கேள்விக்குறி.

ஒரே குடும்பத்தில் அதுவும் 22 பேர் இறப்பதென்பது கனவிலும் நடந்திராத ஒன்று.

பழவேற்காடு சம்பவத்தில் அந்த குடும்பத்தினர் பாதுகாப்பு விஷயத்தில் கொஞ்சம் கூட அக்கறைக் கொள்ளவில்லை

என்பது நன்றாகவேத்தெரிகிறது. முன்னெச்சரிக்கை இல்லாவர்களால், இன்று அனைவரும் தங்களது உயிரை இழந்ததோடு மட்டுமல்லாமல்,

மூன்று சிறுவர்களையும் அனாதைகளாக தவிக்க விட்டுள்ளனர்.

ஏதோ...மொத்தக் குடும்பமும் தரையில் பிரயாணம் பண்ணுவதுபோல் பிரயாணம் செய்துள்ளனர். தரை வேறு தண்ணிர் வேறு என்பதை அவர்கள் அறியவில்லை கொஞ்சம் கூட உணரவில்லை. ஒரு சிறு தவறு பெரும் விபத்தினை தோற்றுவித்துள்ளது.

தேவை முன்னெச்சரிக்கை !

திருமணம், காதுகுத்தி, குடும்ப நிகழ்ச்சிகள், துக்க காரியம் போன்றவற்றிக்கு செல்லும்போது வேனிலோ அல்லது லாரியிலோ புளிமூட்டை போல் திணித்துக் கொண்டு செல்கின்றனர். ஒரு வளைவில் திரும்பும்போது, வண்டி மொத்தமாய் கவிழ்ந்து பெரும் உயிர் பலி ஆகின்றது.

இப்படித்தான் சில வருடங்களுக்கு முன்னர், சென்னைக்கு அருகில் உள்ள சுங்குவார்சத்திரத்தில் டிராக்டரில் திருமணத்திற்கு சென்றவர்களை பெட்ரோல் டேங்கர் லாரி மோதி அனைவரும் எரிந்து சாம்பலாயினர், என்பது நினைவிருக்கலாம்.

நம்மில் பெருவாரியான மக்கள் பிரயாணத்தின் போது பாதுகாப்பைப் பற்றித் துளியும் கவலைப்படுவதில்லை. எந்த வண்டியில் எந்த அளவிற்கு ஏற்ற முடியுமோ அந்த அளவிற்குதான் ஆட்களை ஏற்ற வேண்டும். கொள்ளலவைத் தாண்டி ஏற்றும்போதுதான் அது விபத்தில் முடிந்துவிடுகிறது.

குடும்பத்தினர் கூடும்போது கவனிக்கவேண்டியவை.....

கூடுமானவரை குடும்பத்தினர் எல்லோரும் ஒரே வண்டியில் பிரயாணம் செய்வதை தவிர்த்திடுங்கள்.
சுற்றலா போகும் இடத்தில் படகு பயணம் என்றால் 'லைப் ஜாக்கெட்' பயன்படுத்துங்கள்.
அப்படியே படகு பயணம் என்றால் எல்லோரும் ஒரே படகில் ஏற வேண்டாம். குழுவாக பிரிந்துக் கொண்டு பயணம் செய்யலாம்.
சிறு குழந்தைகளை வைத்துக் கொண்டு ஆபாத்தான பயணம் மேற்கொள்ளவேண்டாம்.
முக்கியமாக நமக்கு எந்த ஆபத்தும் நிகழாது என்று நினைக்க வேண்டாம்.

' யாரும் தெரிந்தே ஆபத்தில் சிக்கிக் கொள்ளமாட்டார்கள் என்பதை உணர்ந்து எப்போதும் விழிப்புடன் இருப்பதே நலம்.'

சென்னை புத்தகக் காட்சி விளம்பர தூதுவராக நடிகர் சூர்யா!

2011-12-22T21:46:00.000+05:30

சூர்யா

       தமிழ் சினிமாவின் முன்னணி நடிகரான சூர்யா சென்னையில் தொடங்க இருக்கும், 35வது சென்னை புத்தகக் காட்சிக்கு விளம்பர தூதுவராக நியமிக்கப்பட்டுள்ளார்.

இன்று (22/12/2011) மதியம் சென்னை அமைந்தகரையில் உள்ள செயின்ட் ஜார்ஜ் பள்ளி வளாகத்தில் நடைபெற்ற, புத்தக அரங்க ஒதுக்கீடு நிகழ்ச்சியில் பப்பாசியின் தலைவர் ஆர்.எஸ்.சண்முகம் (செண்பகா பதிப்பகம்) இத் தகவலை தெரிவித்தார். 20 வினாடிகள் வரும் இந்த விளம்பரத்தில், சூர்யா... மக்களிடையே புத்தக வாசிப்பின் மகத்துவத்துவத்தை   அறிவுறுத்தும்வகையில் எடுக்கப்பட்டுள்ளதாகத் தெரிவித்தார்.

அவர் மேலும் கூறியதாவது...

சீரியஸ் ரைட்டர்ஸ்க்கு விருது!

"பொதுவாக மாடர்ன் ரைட்டர்ஸ்க்குதான் புத்தகக் காட்சியின் போது விருதுகள், பாராட்டுகள் வழங்கப்படுகிறது என்றும், சீரியஸ் ரைட்டர்ஸ்க்கு அந்த வாய்ப்புக் கிடைக்கவில்லை. அவர்கள் சென்னை புத்தகக் காட்சியில் புறக்கணிக்கப்படுகிறார்கள் என்றும் ஒரு பேச்சு உள்ளது. அதனால், அதை துடைக்கும் வகையில், இந்த வருடம் சீரியஸ் ரைட்டர்ஸ்க்கு விருதுகள் வழங்கப்படும்.

இந்த வருட கலை நிகழ்ச்சியில் மாற்று நிறனாளிகளுக்கு வாய்ப்பு வழங்கப்படும். அதோடு,   புத்தகத் துறையில் 30 வருடங்கள் பணி நிறைவு செய்தவர்களுக்கு பாராட்டி சான்றிதழ் வழங்கப்படும்.   புத்தகக் காட்சி அரங்கிற்குள் LCD டிவிக்கள் வைத்து குறந்த கட்டணத்தில், பதிப்பாளர்களுக்கு விளம்பரம் செய்துத் தரப்படும்." என்றார்.

எழுத்தாளர்களுடன் நேரடி உறையாடல்.

எழுத்தாளர் ஞானி

அடுத்து பேசிய எழுத்தாளர் ஞானி "இந்த முறை வாசகர்கள் எழுத்தாளர்களை நேரடியாக சந்திக்கும் பொறுட்டு, தினந்தோறும் ஒரு எழுத்தாளர் சந்திப்பு நடத்தப்படும். இதில் மொத்தம் 18 எழுத்தாளர்கள் பங்கேர்ப்பார்கள். எந்தந்த எழுத்தாளர்கள், வாசகர்களை சந்திப்பார்கள் என்பதை பின்னர் முடிவு செய்வோம். இந்த முயற்சியில் நான், பாரதி புத்தகலாயம் நாகராஜன், மற்றும் கிழக்கு பதிப்பகம் பத்திரி சேஷாத்ரி ஆகியோர் ஈடுப்பட்டுள்ளோம் " என்றார்.

முடிக்கும் போது...."இந்த முயற்சி எல்லாம் என்னுடையது அல்ல, இது முழுக்க முழுக்க பப்பாசியினுடையது" என்றார்... தப்பிக்கும் நோக்கில். தேர்வில் விடுப்பட்ட எழுத்தாளர்கள் தம் மீது கோபப்படக் கூடாது என்ற முன்னெச்சரிக்கையாகக் கூட இருக்கலாம்.

எப்போதும் பேண்ட் ஜிப்பாவில் வரும் ஞானி, இன்று வேஷ்டி ஜிப்பாவில் வந்திருந்தார். அதற்கே ஒரு ஷொட்டு கொடுக்கலாம்.

நன்றி: சூர்யா புகைப்படம் சவுத் ட்ரீம்ஸ்.

மதுரை வெங்கடேசனுக்கு சாகித்ய அகாடமி விருது!

2011-12-22T07:19:00.001+05:30

தெளிவாகப் படிக்கசெய்தியை 'கிளிக்' செய்து படிக்கவும்.

நன்றி: தினமணி.

தூங்காதே பெண்ணே தூங்காதே...!

2011-12-20T07:50:00.000+05:30

விளம்பரம் ஏக பொருத்தம் !

No Comments!

இன்றைய தினமணியில் (20/12/2011) முதல்பக்கத்தில் சசிகலா நீக்கம் பற்றிய செய்தியும், அதற்கு கீழே...'லலிதா ஜூவல்லரி' விளம்பரமும் வெளியாகியிருக்கிறது. மேலே உள்ள செய்திக்கு கீழே உள்ள விளம்பரம் பல உண்மைகளை சொல்லாமல் சொல்கிறது.

இனி நீங்களே பார்த்துப்... படித்து... புரிந்துக் கொள்ளுங்கள்.

ஜெயலலிதா அதிரடி முடிவு: சசிகலா அதிமுவில் இருந்து நீக்கம்.

2011-12-19T13:41:00.001+05:30

சசிகலா உட்பட அவரது குடுத்தினர் எல்லோரும் அதிமுகவிலிருந்து நீக்கம்.

அதிமுகவில் இருந்து வி.கே.சசிகலா, ம.நடராஜன், திவாகர் (மன்னார்குடி), டிடிவி. தினகரன், வி.பாஸ்கரன், வி.என்.சுதாகரன், டாக்டர். எஸ்.வெங்கடேஷ், எம்.ராமச்சந்திரன், இராவணன், மோகன் (அடையாறு), குலோத்துங்கன், ராஜராஜன் உள்ளிட்ட 12 பேர் கழகத்தின் அடிப்படை உறுப்பினர் பொறுப்பு உட்பட அனைத்து பொறுப்புகளில் இருந்தும் நீக்கப்பட்டுள்ளனர் என்றும், அஇஅதிமுகவினர் யாரும் இவர்களுடன் எவ்வித தொடர்பும் வைத்துக்கொள்ளக்கூடாது என்றும் அஇஅதிமுக பொதுச்செயலாளரும், முதல் அமைச்சருமான ஜெயலலிதா அறிவித்துள்ளார்.

சசிகலாவை அவர் கட்சியிலிருந்துதான் வெளியேற்றி உள்ளார் போயஸ் கார்டனலிருந்து அல்ல என்பது குறிபிடத்தக்கது. கொஞ்ச நாளாய் புகைந்துக் கொண்டு இருந்த ஒரு விஷயம் இப்போது வெளிச்சத்திற்கு வந்துள்ளது.

இந்திய தேசத்து 'பார்சி' ராஜாக்கள்!. பகுதி 2

2011-12-17T22:39:00.001+05:30

பார்சிக்களின் வரலாறும் - வாழ்க்கையும் !

முந்தைய பதிவை வாசிக்க இங்கு சொடுக்கவும்....

இந்தியாவில் பார்சிக்கள்.

பொழுது புலர்ந்தது. கடற்கரையில் ஆரவாரம் கேட்டு உள்ளூர் மக்கள் கடற்கரைக்கு திரண்டனர். வெள்ளை வெள்ளேரென்று ஒரு சிறு கூட்டம் சிறு சிறு படகுகளில் வந்து இறங்கியிருந்தது. வந்தவர்கள் மிக அழகான தோற்றம் கொண்டவர்களாக இருந்தனர். நல்ல உயரமும், அகன்ற தோள்களும், எடுப்பான நாசியும் பார்ப்பவரை வசீகரிக்கும் தோற்றத்தில் இருந்தனர்.

வந்தவர்கள் யார் என்ன என்று வினவிய உள்ளூர் மக்கள், உடனே மன்னனுக்கு தகவல் தெரிவித்தனர். மன்னன் அந்தக் கூட்டத்தின் தலைவனை அழைத்துவரச் சொன்னான்.

" யார் நீங்கள் எதற்கு வந்திருக்கின்றீர்கள்?" என்றான் மன்னன்.

பெர்ஷியன்ஸ்

"மன்னா...நாங்கள் பெர்ஷியா (ஈரான்) தேசத்தவர். எங்கள் நாட்டில் எங்களை மதம் மாறச் சொன்னதாலும், தொடர்ந்து எங்களுக்கு இன்னல் செய்து, எங்கள் இனத்தாரை அங்கிருந்த அன்னிய அரசு அழித்ததாலும், நாங்கள் அடைக்கலம் தேடி வந்திருக்கின்றோம். அடிப்படையில் நாங்கள் வியாபாரிகள். எங்களது குலத் தொழிலே வியாபாரம் செய்வதுதான். எங்களுக்கு இங்கு இருக்க இடமும், வியாபாரம் செய்யவும் அனுமதித்தால் நாங்கள் பிழைத்துக் கொள்வோம்" என்றான்.

அதற்கு மன்னன். " நீங்களோ வேற்று தேசத்தவர், அதோடு வேற்று மதத்தையும் சேர்ந்தவர்கள். மொழியும் வேறு, உங்களை இங்கு தங்க அனுமதித்தால் அது எனது மக்களை பாதிக்கும். நாங்கள் மொழியாலும் கலாச்சாரத்தாலும் உங்களிடமிருந்து வேறுபட்டவர்கள். நீங்கள் இங்கு தங்க அனுமதிக்க முடியாது " என்றான் மன்னன்.

" மன்னா எங்களுக்கு சிறிது காலம் கொடுங்கள், நாங்கள் உங்கள் மொழியை கற்றுக் கொள்கிறோம். உங்கள் மக்களோடு இணைந்து வாழ்கின்றோம். அவர்களுக்கு எப்போதும் தீங்க செய்ய மாட்டோம்." என்றான் அந்தக் கூட்டத்தின் தலைவன், மன்னனைப் பார்த்து....மன்னா கொஞ்சம் பாலும் சக்கரையும் கொடுங்கள்" என்றான்.

பாலும் சக்கரையும் வந்தது.

பாலில் சக்கரையை போட்டு கரைத்த அந்த தலைவன், பாலை மன்னனிடம் நீட்டி அருந்தச் சொன்னான். "மன்னா...இனி நாங்கள் இப்படி இருப்போம். உங்களொடு கலந்து இருப்போம்" என்றான்.அதைக் கண்டு மகிழ்ந்த மன்னன், அவர்களுக்கு தங்க இடமும், அவர்கள் கோயில் கட்டிக் குடியேற நிலமும், வியாபரம் செய்யவும் அனுமதித் தந்தான்.

பார்சிக்கள் இந்தியாவில் குடியேறியதைப் பற்றி இப்படி ஒரு செவிவழிச் செய்தியும் உண்டு.

ஆனால், உண்மையில் அப்படி அல்ல....

இந்தியாவின் மேற்கு கடற்கரையில் உள்ள சாஞ்சன் என்ற தீவில்தான், பார்சிக்கள் முதன்முதலில் குடியேறினார்கள்.

கடவுளர்கள்

(தற்போது குஜராத்) அந்தப் பகுதியை ஜாதி ராணா என்ற அரசன் ஆண்டுவந்தான். பார்சிக்களை யாரும் தங்க தட்டில் வைத்து அழைக்கவில்லை. குடியேறியது முதல் அவர்கள் ஆங்காங்கே மறைந்து வாழ்ந்து வந்தனர். பார்சிக்கள் இந்தியாவில் காலடி வைத்ததுப் பற்றிய ஒரு பாடல் சம்ஸ்கிருதத்தில் இருக்கிறது. கிபி 1600ம் வருடம் பார்சிக்களின் மதகுரு பொஹ்மன் கைகோபாத் இதை இயற்றினார் என்றும் கூறப்படுகிறது.

குஜராத் 'சாஞ்சனில்' குடியேறிய பார்சிக்கள் 10ம் நூற்றாண்டில் குஜராத்தின் வடக்கு மற்றும் தெற்குப் பகுதிகளில் பரவியிருந்தனர். அங்க்லேஷ்வர், பரூச், கம்பத், நவ்சாரி, சூரத், வாங்கனெர் மற்றும் வாரியவ் போன்ற நகரங்களில் பிற்பாடு இடம்பெயர்ந்தார்கள்.

1290 வாக்கில் குடியேறிய இடத்தின் பெயரை வைத்தே அவர்கள் 5 மத பிரிவுகளாக (குழுக்களாக) பிரிந்தனர். பகாரியஸ் (நவ்சாரி), பரூச்சா, கோதாவரா (சூரத்), , கம்பட்டா, சாஞ்சனாஸ் என்று வழிபாடு முறைகளின் வேறுபாட்டின் மூலம் அழைக்கப்பட்டனர். (About the year 1290 the Parsis were under 5 different groups of priests based on the geographical location in Gujarat. These priestly groups were: The Bhagarias (Navsari), Bharucha, Godavra (Surat), Khambatta and Sanjanas )

போர்புரிந்த பார்சிக்கள்.

பார்சிக்களை இந்தியர்கள் அவ்வளவு சுலபமாக ஏற்றுக் கொள்ளவில்லை. 11ம் நூற்றாண்டில் ராஜபுதானத்து அரசு அவர்கள் மீது விதித்த அதிகப்படியான வரியை கட்டாமல் அரசை எதிர்த்தனர். சிறிது காலம் கழித்து ராஜபுதானத்து அரசு, வரி வசூலிக்க அனுப்பிய படைகளோடு சண்டையிட்டு அவர்களை தோற்கடித்தனர்.

பார்சி வழிப்பாட்டுத்தளம்.

பார்சிக்களில் ஆண்கள் மட்டுமல்லாமல், பெண்களும் தீரமுடன் இருந்துள்ளனர். ராஜபுதானத்துப் படைகளை ஒரு பெண் தனியாக நின்று எதிர்த்திருக்கிறாள். அவளின் நினைவாக வருடம் தோறும் சூரத் நகரில் விழா எடுக்கப்பட்டு கொண்டாடப்படுகிறது.

இதற்கிடையே இந்தியாவில் முஸ்லீம்களின் ஆதிக்கம் அதிகரித்தது. 1400ல் ஹிந்துக்களின் நகரான சஞ்சன் நகரை முஸ்லீம்கள் கைப்பற்றினார்கள். வடக்கு குஜராத்தை ஆண்டு வந்த ஹிந்து மன்னன் பார்சிக்களின் துணையை நாடினான். அவர்கள் இந்து அரசனுக்கு 1400 பார்சிக்களைத் தந்து உதவி புரிந்தார்கள்.

மூஸ்லீம்கள் மீண்டும் பெரும் படையைத் திரட்டி சஞ்சன் நகரை துவசம் செய்தனர். அதற்குள் பார்சிக்கள் தங்களது புனித 'தீ' யை கைப்பற்றி, அருகில் உள்ள பெக்ரூட் என்ற மலையில் பத்திரப்படுத்திக் கொண்டனர். .

பார்சிக்கள் இந்தியா வந்ததன் நோக்கமே...தங்களது மதத்தைக் காப்பற்றிக் கொள்ளத்தான். ஆனால் நடந்தது வேறு.....?

-மீதி அடுத்தப் பதிவில்....!

மறக்க முடியாத சில மார்கழி நினைவுகள்....!

2011-12-17T07:44:00.000+05:30

இன்று தொடங்கி பொங்கல் வரை மார்கழி மாதம் வெகு விமரிசையாக கொண்டாடப்படும். விடியற்காலையிலேயே விழித்தெழும் மக்கள் வீடு வாசல் பெறுக்கி, வாசலில் மா கோலம் போட்டு 'மார்கழியை' வரவேற்கத் தொடங்கிவிடுவர். அடிப்படையில் குளிர் நிறைந்த பனிக் காலத்தில் தொடங்கும் மார்கழி மாதம், ஒரு இதமான தட்பவெப்ப நிலையிலேயே இருக்கும்.

வெயில் கூட கொஞ்சம் *ஒனக்கையா இருக்கும்.

கோயில்களில் ரேடியோ செட் கட்டப்பட்டு இரு வேளையும் எல்.ஆர் ஈஸ்வரி "மாரியாத்தா எங்கள் மாரியாத்தா...." என்று பாட.... . கூடவே டி.எம்.சொளந்தரராஜன் 'சந்தனமும் ஜவ்வாதும் ' என்று பாடிக்கொண்டு இருப்பார்.

அதுவரை புளியங் கொட்டை வியாபரம் செய்துவந்த ஏவாரி, " கோலமாவே....கலர் கலர் கோலமாவே" என்று சைக்கிளில் கோல மாவு அட்டையைக் கட்டிக் கொண்டு தெரு தெருவாய் சுற்றுவான்.

காலையில் பொம்மணாட்டி தொல்லையால முன்னாடியே எழுந்திடும், வீட்டு பெரிசுகள் அப்படியே ஒரு நட நடந்து கடத்தெருவில சூடா ஒரு டீயை குடிச்சுட்டு, ஒரு சுருட்டப் பத்த வச்சிக்கிட்டு ஊர் நாயம் உலக நாயம் பேச ஆரம்பிச்சிடுவாங்க.

கோலம் போடும் அம்மாவுக்கு ஒத்தாசை பண்றேன்னு....பக்கத்திலேயே கோட்டுவா ஓடுன...வாயோடு ஒக்காந்திருக்கும் வாண்டுகள். அந்தம்மாவும் பக்கத்தூட்டு வாசல பார்த்துக்கிட்டே , அவுங்க கோலம் பெரிசா நம்ம கோலம் பெரிசான்னுட்டு பார்த்துப் பார்த்து கோலம் போடும்.

வண்ணம் தீட்டி போட்ட கோலத்தில் நடுவில் வைக்க பறங்கிப் பூ தேடி கொல்லை கொல்லையாய் சுற்றி வரும் ஒரு கூட்டம். பெரும்பாலும் இந்த மாதங்களில் எல்லோர் வீட்டிலும் பறங்கி செடி போட்டு இருப்பார்கள். அதனால் பறங்கிப் பூ கிடைப்பது அப்படி ஒன்றும் கஷ்டமாக இருக்காது.

எங்கள் ஊரில் வைணைவர்கள் இல்லை என்பதால், இங்கு அந்த பஜனை எல்லாம் கிடையாது. ஊரைச் சுற்றி சிவன் கோயில்களே அதிகம். ஓதுவார்கள் விடியற்காலையில் சங்கு ஊதிக்கொண்டு மணி அடித்துக் கொண்டு, தேவாரம் திருவாசகம் பாடிக் கொண்டு செல்வார்கள். எங்கள் ஊரில் இந்த மாதம் முழுவதும் அம்மனுக்கு விரதம் இருந்து கன்னிப் பொங்கல் அன்று விரதம் முடிப்பார்கள்.

கோயில்களில் காலை மாலை இரு வேளையும் சிறப்பு வழிபாடு இருப்பதால், கோயிலில் கூட்டம் அதிகமாக இருக்கும்.

மார்கழி ஒன்றாம் தேதியிலிருந்து ஒவ்வொரு வீட்டிற்கும் ஒரு நாள் 'மண்டகப்படி' உண்டு. அவரவர் வசதிப்படி அம்மனுக்கு பூஜைகள் செய்து பொங்கலிட்டு வழிபடுவார்கள். எங்கள் வீட்டு 'மண்டகப்படி' கன்னிப்பொங்கல் அன்று வரும்.

மார்கழி பனி நிறைந்த காலம் என்பதால், கிராமங்களில் எதிரில் யார் இருக்கிறார் என்று கூடத் தெரியாது. அந்த அளவிற்கு பனி அடர்த்தியாக இருக்கும். அப்போதுதான் பயிர் பச்சைப் பிடித்து கொஞ்சமாய் சூல் கொள்ள ஆரம்பிக்கும். மார்கழி மாத நடுவில் சூல் கொண்ட கதிரிலிருந்து பால்கட்டிய நெற்கதிரின் வாடை வரும். மார்கழி முடிவு அல்லது தை மாதத் தொடக்கத்தில் அறுவடைத் தொடங்கிவிடும்.

ஊரெங்கும் பச்சைப் பட்டு விரித்ததுபோல, வயல் வெளியெங்கும் கரும்பச்சையில் பூமித்தாய் பூரித்திருப்பாள். மார்கழி பீடை மாதம் என்பதால், எந்தவித சுப காரியமும் செய்யமாட்டர்கள். ஆனால், அந்த மாதம் முழுவதும் ஆன்மீகம் ரவுண்டுக் கட்டி அடிக்கும். ஊர் முழுசும் நான்வெஜ்க்கு தடா போட்டிருக்கும்.

()()()()()()()()()()()()()()()()()()

*இதமா.

சென்னை புத்தகக் காட்சி ஜனவரி 5ம் தேதி தொடங்குகிறது.

2011-12-16T22:03:00.000+05:30

இந்தியாவில் மிகப் பெரிய புத்தகக்காட்சியாக வளர்ந்துவரும் சென்னை புத்தகக் காட்சி அடுத்தமாதம் (ஜனவரி) 5ம் தேதி சென்னை அமைந்தகரையில் உள்ள செயின்ட் ஜார்ஜ் பள்ளி வளாகத்தில் தொடங்குகிறது.

35வது புத்தகக் காட்சி ஜனவரி மாதம் 5ம் தேதி தொடங்கி ஜனவரி 17ம் தேதிவரை நடைபெறுகிறது. புத்தாண்டு மற்றும் பொங்கல் விடுமுறையை உள்ளிட்டே அந்த நாட்களில் வருடம் தோறும் இக் காட்சி நடைபெற்றுவருகிறது. கடந்த நவம்பர் மாதம் பதவியேற்றுக் கொண்ட ஆர்.எஸ்.சண்முகம் (செண்பகா பதிப்பகம்) அவர்களின் தலைமையிலான பபாசி நிர்வாகிகள் குழு, முழு மூச்சுடன் புத்தகக் காட்சிக்கான ஏற்பாடுகளை செய்துவருகிறது!.

கிட்டத்தட்ட 600க்கும் மேற்பட்ட புத்தக அரங்குகள், இந்த முறை கண்காட்சியில் இடம் பெறுகின்றன. புத்தகக் காட்சியில் இடம் பெறும் நிறுவனங்களின் எண்ணிக்கை வருடம் தோறும் அதிகரித்தவன்னமே இருக்கின்றது. அதேபோன்று புத்தகக் காட்சியில் இடம் கிடைக்காமல் திரும்பிச் செல்லும் நிறுவனங்களின் எண்ணிக்கையும் கனிசமான அளவில் உயர்ந்துதான் இருக்கிறது என்பது குறிப்பிடத்தக்கது.

புத்தகக் காட்சி நடைபெறும் அனைத்து நாட்களிலும் பல்வேறு இலக்கிய உரைகள், புத்தக வெளியீடுகள், கவியரங்கம், கலை நிகழ்ச்சிகள், பட்டிமன்றம், இன்னிசை பாட்டு மன்றம் போன்ற பல்வேறு இலக்கிய நிகழ்ச்சிகள் நடைபெறுகின்றன.

இம் முறை சென்னை சங்கமம் நடத்தப்படுமா...? என்று தெரியாத நிலையில், சென்னை புத்தகக் காட்சிக்கு அதிக எண்ணிக்கையில் மக்கள் வருவார்கள் என்று எதிர்பார்க்கப்படுகிறது...!

இந்திய தேசத்து 'பார்சி' ராஜாக்கள்!.

2011-12-11T15:15:00.003+05:30

பார்சிக்களின் வரலாறும் - வாழ்க்கையும் !

பார்சிக்களின் வழிபாடு

நவீன இந்தியாவில் பார்சிக்களின் பங்களிப்பு மகத்தானது. சுதந்திரதிற்குப் பிறகான வர்த்தக விரிவாக்கத்தில், தங்களை முழுமையாக ஈடுபடுத்திக் கொண்டவர்கள் பார்சிக்கள். மக்கள் தொகையில் மிகக் குறைந்த எண்ணிகை கொண்ட பார்சிக்கள், ஜவுளி, எஃகு, கப்பல் மற்றும் சாலை போக்குவரத்து, நிதி நிர்வாகம் என்று அனைத்துத் துறைகளிலும் தங்களது பங்களிப்பை இந்தியாவிற்காக இதய சுத்தியுடன் ஆற்றியுள்ளனர். அவர்கள் பங்களிப்பின்றி இந்திய வர்த்தக உலகம் முழுமை அடைவதில்லை!.

அடிப்படையில் வியாபாரிகளான பார்சிக்கள், தங்களது உயர்வான வியாபார அனுகுமுறையால் இந்திய வர்த்தக உலகை எப்போதும் காப்பாற்றி வருகின்றனர். இந்தியாவின் வர்த்தக தலைநகராக மும்பையை மாற்றியது பார்சிக்கள்தான்.

1951ல் எடுக்கப்பட்ட மக்கள் தொகை கணக்கெடுப்பின்படி 1.12 லட்சம் பார்சிக்கள் இருந்துள்ளனர். 2001ம் வருடம் எடுக்கப்பட்ட கணக்கெடுப்பில் அதுவே 70 ஆயிரமாக குறைந்துவிட்டது. வர்த்தகத்தை பெறுக்கத் தெரிந்த பார்சிக்களுக்கு, தங்களது வர்க்கத்தை பெறுக்கத் தெரிந்திருக்கவில்லை? என்பது ஆச்சரியமான விஷயம்தான்!.

யார் இந்த பார்சிக்கள்? அவர்கள் எந்த மாநிலத்தை சார்ந்தவர்கள் என்ற கேள்வி உங்களுக்குள் இயல்பாக எழும்? அவர்கள் இந்தியாவிற்காக என்ன செய்துவிட்டார்கள்....? என்ற கேள்வியும் நீங்கள் கேட்கக் கூடும்?.

பார்சிக்களின் வியாபார சாம்ராஜ்ஜியத்திற்கு "டாடா" ஒரு சோறு' பதம்!.

டாடாவிற்கு புதிய தலைவர்.

'சைரஸ் பலோன்ஜி மிஸ்திரி

இந்தியாவில் முக்கால்வாசி இந்தியர்கள், தினந்தோறும் எப்படியாயினும் இந்த வார்த்தையை உச்சரிக்காமலேயோ, அல்லது பயன்படுத்தாமலேயோ இருக்க மாட்டார்கள். நகரம் முதற்கொண்டு சிறு கிராமம் வரை டாடாவின் ஏதாவது ஒரு பொருளை எங்கேயாவது ஒரு இந்தியன் பயன்படுத்திக் கொண்டுதான் இருப்பான். உப்பு, ரசாயனம், ஜவுளி, நிதி, உருக்கத் துறை, மோட்டார் வாகனத் தயாரிப்பு, தகவல் தொழிற்நுட்பம், மின் உற்பத்தி என பல்வேறு வர்த்தக நடவடிக்கையில் டாடா குழுமம் ஈடுப்பட்டு வருகின்றது.

இந்தியாவின் 143 ஆண்டுகள் பாரம்பரியம் மிக்க 379,675 கோடி (83 பில்லியன் டாலர்) வர்த்தகம் கொண்ட டாடா சாம்ராஜ்ஜியத்திற்கு 'சைரஸ் பலோன்ஜி மிஸ்திரி' புதிய தலைவராக தேர்ந்தெடுக்கப்பட்டுள்ளார். 43 வயது கொண்ட சைரஸ் மிஸ்திரி டாடா குழுமத்தின் 6வது தலைவராவர். இளம் வயதில் தலைவராக தேர்ந்தெடுக்கப்பட்டவரும் இவரே...!

கட்டுமான வியாபாரத்தில் மிக முக்கிய புள்ளியான பலோன்ஜி மிஸ்திரியின் இளைய மகன்தான் இந்த சைரஸ் மிஸ்திரி. ஃபோர்பஸ் பத்திரிகையின் கூற்றுப்படி 8.8 பில்லியன் டாலர் சொத்துமதிப்பு கொண்ட, பார்சி சமூதாயத்தின் 'ரிச்சஸ்ட் பார்சி'யாவார். டாடா குடும்பத்தை சாராத இரண்டாவது தலைவரும் இவரே!. சைரஸ் மிஸ்திரியை நியமித்ததன் மூலம் தனது பார்சி தலைமையை தக்கவைத்துக் கொண்டுள்ளது டாடா குழுமம் என்கின்றது தி நியு இந்தியன் எஃஸ்பிரஸ் நாளிதழ். டாடா குழுமத்தின் அதிகப்படியான பங்குளை கொண்ட முதலீட்டாளர் மிஸ்திரி, என்பதும் குறிப்பிடத்தக்கது.

ரத்தன் டாடா

73 வயதான ரத்தன் டாடா ஓய்வுபெற்றுவிட்டார். ரத்தன் டாடாவின் தலைமையில், உலக அளவில் மிகக் குறைந்த விலையில் நானோ காரை தயாரித்து, உலக மக்களின் கவனத்தை இந்தியாவின் பால் ஈர்த்தது டாடா நிறுவனம். பல புதிய சாதனைகளை உலக அளவில் செய்தது டாடா குழுமம். தனிமை விரும்பியான ரத்தன் டாடா, திருமணமே செய்துக் கொள்ளவில்லை என்பது குறிப்பிடத்தக்கது.

நவீன இந்தியாவின் கட்டமைப்பில் 'டாடா' என்ற வார்த்தை தவிர்க்க முடியாத ஒன்று!. சுதந்திரத்திற்குப் பிறகான, இந்தியாவின் வளர்ச்சியில் டாடா குழுமத்தின் பங்கு மகத்தானது. 86 நாடுகளில் டாடா குழுமம் கிளை பரப்பி இருக்கிறது. உலக அளவில் சுமார் 4 லட்சத்திற்கு மேற்பட்ட ஊழியர்கள் டாடா குழுமத்தில் பணிபுரிகின்றனர், என்கின்றபோதே... அதன் பிரம்மாண்டம் நமக்கு புரிந்திருக்கும்!.

பார்சிக்கள் யார்? / பார்சிக்களின் வரலாறு.

வழிபாடு

இந்தியாவில் பார்சிக்களின் வரலாறு 9 மற்றும் 10ம் நூற்றாண்டிலிருந்து தொடங்குகிறது. அடிப்படையில் ஈரான் நாட்டை சார்ந்த ஜொரொஸ்டியன் மதத்தை சார்ந்தவர்கள் பார்சிக்கள். அரேபியர்கள் ஈரானை கைப்பற்றியதைத் தொடர்ந்து, தங்களை இனரீதியாகக் காப்பாற்றிக் கொள்ள இந்தியாவில் குஜராத் மாநிலத்தில் தஞ்சம் புகுந்தார்கள்.

அரேபியர்கள் ஈரானில் தங்களது மதமான இஸ்லாத்தை, பரப்பினார்கள். இஸ்லாம் மதத்தை பின்பற்றாதவர்களுக்கு 'ஜசியா' என்ற வரியை விதித்தனர். கடுமையான அந்த சட்டம் ஜொரொஸ்டியன் மதத்தை பின்பற்றி வந்த பார்சிக்களை கடுமையாக பாதித்தது. வரி கட்டாதவர்களுக்கு சாட்டை அடியும், கடுமையான சிறை தண்டனையும், அடிமையாக நாடு கடத்தவும் செய்தனர். சில நேரங்களில் மரணதண்டனையும் வழங்கப்பட்டது.

வரி கட்டாதவர்களுக்கு இந்த நிலை என்றால், வரி கட்டுபவர்களையும் கேவலமாக நடத்தினார்கள் வரி வசூல் செய்வர்கள்.

ஜொரொஸ்டியன் மத கோயில்கள் இடிக்கப்பட்டு, அங்கு மதரஸாக்கள் கட்டப்பட்டு இஸ்லாம் போதிக்கப்பட்டது. ஜொரொஸ்டியன் மத குழந்தைகள் வலுக்கட்டாயமாக இஸ்லாத்திற்கு மாற்றப்பட்டு, குரான் கற்றுத்தரப்பட்டது. அரேபியர்களின் நோக்கம் ஜொரொஸ்டியன்களை கொல்வதல்ல!, மாறாக அவர்களை இஸ்லாத்திற்கு மாற்றுவதுதான் முக்கியமான வேலையாக இருந்தது.

பார்சிக்களின் மதச் சின்னம்

ஜொரொஸ்டியன் மதத்திற்கும் இஸ்லாம் மதத்திற்கும் அதிக ஒற்றுமைகள் காணப்பட்டன. சொர்க்கம் நரகம், ஆண்டவரின் இறுதித் தீர்ப்பு, தினமும் 5 வேளை தொழுகை (ஜொரொஸ்டியன் கீக்ஸ் - similar to the five Zoroastrian Gehs) போன்றவை இரு மதத்திற்கும் பொதுவானவையாக இருந்தன. இதனாலேயே சில ஜொரொஸ்டியன்களுக்கு மதம் மாறுவது ஒரு பிரச்சனையாக இருக்கவில்லை. ஆனால் பெரும்பாலான ஜொரொஸ்டியன்கள் அன்னிய மதத்தை ஏற்காமல், தங்களது மதத்தையே பின்பற்றிவந்தனர். தங்களது பிள்ளைகளுக்கு தமது மதத்தின் உயரிய கோட்பாடுகளைக் கூறி வளர்த்தனர்.

இரு மதங்களுக்கும் சில ஒற்றுமைகள் காணப்பட்டாலும் வழிபடும் முறைகளில் மாற்றம் இருக்கத்தான் செய்தது. ஜொரொஸ்டியன்கள் கொழுந்து விட்டு எரியும் புனித நெருப்பையே கடவுளாக வணங்கினார்கள். மெக்கா திசை நோக்கி தொழுகை நடத்தவும், மண்டியிட்டு அல்லாவை வணங்கவும் அவர்கள் தயாரில்லை. இதனாலயே கலிபாக்களின் ஆட்சியில், அவர்களுக்கு மரணதண்டனைகள் வழங்கப்பட்டன.

இந்தக் காலகட்டத்தில், ஈரானில் இஸ்லாம் தீவிரமாகப் பரப்பப்பட்டது. புனிதர் முகமதின் வழி வந்த கலிபாக்கள் ஈரானை ஆண்டு வந்தனர். இஸ்லாம் அல்லாத அல்லது மதம் மாறாத பிற மதத்தினர் அங்கு வாழ்வது கடினம் என்ற சூழல் ஏற்பட்டது. மதம் மாறாத பிற மதத்தினருக்கு கடும் இன்னல்கள் தரப்பட்டன. மதம் மாறாதவர்கள், செத்து ஓழிய வேண்டும் அல்லது சொந்த நாட்டை விட்டு ஓட வேண்டும், அல்லது அன்னிய மதத்திற்கு மாற வேண்டும். இதுதான் ஈரானின் அப்போதைய நிலை?

இனியும் இங்கு வாழ்ந்தால் தங்களையும் தங்களது மதத்தையும் காப்பாற்ற முடியாது என்றுணர்ந்த ஜொரொஸ்டியன்கள், 10ம் நூற்றாண்டு தொடக்கத்தில் இந்தியாவிற்கு அடைக்களம் தேடி புறப்பட்டனர். ஒரு குழுவாக புறப்பட்ட அவர்கள், இந்தியாவில் மேற்கு கடற்கரையோரம் ஒரு தீவில் இறங்கினார்கள்.

-தொடரும்

உலகில் சோகத்தில் எல்லாம் பெரிய சோகம் எது தெரியுமா....?
பிறந்த மண்ணைவிட்டு பிரிவதுதான்.

சென்னையைச் சுற்றி நான் எடுத்த புகைப்படங்கள்....

2011-12-06T17:26:00.004+05:30

நமக்கு சென்னையை நீள அகலத்தில் அளக்கிற வேலை!. அதாங்க... மார்கெட்டிங் ஜாப். எங்க எதப் பார்த்தாலும் உடனே....ஒரு 'கிளிக்'. அப்படி சென்னையை சுற்றி அவ்வப்போது நான் எடுத்த புகைப்படங்கள் உங்கள் பார்வைக்கு...

'மெரீனாவில் எல்லோரும் ஜோடியோடு இருக்க...இந்த பனைமரம் மட்டும் தனிமையாய்...'

'உழைப்பின் உன்னதத்தை உலகிற்கு உணர்த்திய உழைப்பாளர் சிலை'

மூன்றெழுத்தில் மூச்சிருக்கும், எம்ஜிஆர்.
அது முடிந்த பின்னால்.... உறங்கும் இடம் இது...!
'கல்லறையில் காதுவச்சி கேட்டா....கடிகாரம் சத்தம் கேட்குமா....?'

சென்னை ஓமந்தூரார் தோட்டத்தில் உள்ள ராஜாஜி ஹால்.
இப்போது புதிய சட்டமன்றக் கட்டிடத்தில் மறைந்திருக்கிறது.

தேவாலயத்தை சுற்றி கல்லறைகள்!: ஆங்கிலேயே அதிகாரிகளின் கல்லறைகள் தேவாலயத்தைச் சுற்றி தரையில் புதைக்கப்பற்றிருக்கிறது. (அம்பு குறியிட்டு காட்டப்பட்டுள்ளது) சென்னை செயின்ட் ஜார்ஜ் கோட்டையில் உள்ள 400 ஆண்டுகள் பழமை வாய்ந்த செயின்ட் மேரிஸ் தேவாலயத்தில் எடுக்கப் பட்ட படம்.

சென்னை செயின்ட் ஜார்ஜ் கோட்டையில் உள்ள 400 ஆண்டுகள் பழமை வாய்ந்த செயின்ட் மேரிஸ் தேவாலயத்தில் எடுக்கப் பட்ட படம். நந்தவனம்....

வடபழனி சரவணா பவன் ஹோட்டல் வாசலில் உள்ள ஈச்ச மரம்.

நேப்பியர் பாலத்திற்கு அருகில் உள்ள கூவம் ஆற்றின் முகத்துவாரம். இந்த பாலத்தை நீங்கள் நிறைய திரைப்படங்களில் பார்த்திருக்கலாம்.

சென்னை செயின்ட் ஜார்ஜ் கோட்டை அருகில் இருக்கும், போர் வீரர்கள் நினைவுத் தூண்.

விஜிபி தங்க கடற்கரையில் வரிசை கட்டி நிற்கும் சிலைகள்.

நேப்பியார் பாலம். சினிமாவில் சென்னையின் அடையாளமாகக் காட்டப்படுகிறது...!

நேப்பியார் பாலம் லாங் ஷாட்!

அடையார் (ஆறு) கடலில் கலக்கும் கழி முகத்துவாரம்.

சென்னையில் ராஜஅண்ணாமலை புரத்தில் உள்ள ஒன்பது மாடி கட்டிடத்தில் இருந்து எடுத்தது.

சென்னையின் முக்கிய அடையாளம். LIC

திருநெல்வேலியிலிருந்து

மதுரை செல்லும் சாலையில் இந்த பிரமாண்டமான முனிஸ்வரர் சிலை இருக்கிறது.... என்று நீங்கள் நினைத்தால் அது தவறு. சாக்ஷாத் சென்னை நகரின் மத்தியில் இப்படி ஒரு சிலை இருக்கிறது என்று சொன்னால் நீங்கள் நம்புவீர்களா?

விபரம் அடுத்தப் பதிவில்....!

"கடமை, கண்ணியம், கட்டுப்பாடு அண்ணா சொன்னது;

அது படும்பாடு நீங்கள் அறிந்தது...! "

அன்னிய முதலீட்டில் அழிபடபோகும் சில்லறை வர்த்தகம். அதிர்ச்சி ரிப்போர்ட். - எஸ். குருமூர்த்தி

2011-11-26T08:47:00.001+05:30

"வருகிறது வால்மார்ட்"

இப்போது வருகிறது, அப்போது வருகிறது என்று "புலிவருது புலி' பாணியில் பாய்ச்சல் காட்டிக் கொண்டிருந்த சில்லறை விற்பனையில் அன்னிய முதலீடு வந்தேவிட்டது. இந்தியச் சில்லறை வர்த்தகத்திலும் அன்னிய நேரடி முதலீட்டுக்குக் கதவைத் திறந்தாகிவிட்டது.

கடந்த சில வாரங்களாகவே இந்தியப் பொருளாதாரம் பெரும் பின்னடைவைச் சந்தித்து வருகிறது. இந்திய ரூபாயின் மதிப்பில் ஐந்தில் ஒரு பங்கு மேலும் சரிவு, அன்னியச் செலாவணி கையிருப்பு வேகமாகக் குறைவு, அன்னிய நிறுவனத் தொழில் முதலீட்டாளர்களின் முதலீடுகள் இந்தியாவிலிருந்து மீண்டும் வெளியேற ஆரம்பித்தது ஆகியப் பொருளாதார நிகழ்வுகளால் என்ன செய்வது என்று முடிவு எடுக்க முடியாமல் திணறிக் கொண்டிருக்கும் இந்திய அரசால் சரிந்து கொண்டிருக்கும் ரூபாயின் மதிப்பையோ விலைவாசி உயர்வையோ கட்டுப்படுத்த முடியாத நிலையில் பொருளாதார சீர்திருத்தத்தில் அடுத்த கட்டம் என்ற பெயரில் அன்னிய பெருவர்த்தகர்களுக்கு இந்தியச் சந்தையில் புகுந்து விளையாடக் கதவுகளைக் கட்டவிழ்த்து விட்டிருக்கிறது அரசு.

உள்நாட்டுப் பெருந்தொழில் நிறுவனங்களும் அயல் நாடுகளின் தொழில் நிறுவனங்களும் கடந்த சில ஆண்டுகளாக இடையறாமல் தூபம் போட்டு வந்த ""மிகப்பெரிய பொருளாதாரச் சீர்திருத்த'' நடவடிக்கைக்கு மன்மோகன் சிங் தலைமையிலான மத்திய அரசு ஒப்புதல் தந்துவிட்டது. இந்த சீர்திருத்தத்துக்காக ""பாடுபட்ட சக்திகள்'' வென்றுவிட்டன. ஆனால், ""இந்தியா'' தோற்றுவிட்டது என்பதுதான் உண்மை.

பெருநகரங்களின் நலன்தான் இந்த அரசின் முக்கிய குறிக்கோள் என்பதை இந்த நடவடிக்கையும் அம்பலப்படுத்தியிருக்கிறது.

இந்திய கிராமப்புறங்கள் குறித்தும் வேளாண்மை குறித்தும் இந்த அரசுக்குப் போதிய அறிவோ, அக்கறையோ இல்லை என்பதையும் இந்த முடிவு உணர்த்துகிறது.

சில்லறை வர்த்தகத்தில் அன்னிய நேரடி முதலீட்டை அனுமதிப்பது என்ற அரசின் முடிவால், இந்த வியாபாரத்தில் நாடு முழுவதும் ஈடுபட்டு வரும் 12 லட்சம் குடும்பங்களின் எதிர்காலம் கடுமையான பாதிப்புக்கு உள்ளாகும் என்பதில் சந்தேகமே வேண்டாம். அதே சமயம் கிராமப்புற இந்தியாவில் இப்போது கிடைத்துவரும் உணவுப் பாதுகாப்பையும் இது சேர்த்தே அழித்துவிடும் என்பது பெரும்பாலானவர்களுக்கு இன்னும் தெரியாமலேயே இருக்கிறது.

இந்திய சில்லறை வர்த்தகத்தில் அன்னிய நேரடி முதலீட்டை அனுமதிப்பதன் மூலம், வால்மார்ட் போன்ற பெரிய நிறுவனங்கள் கிராமங்களுக்கே சென்று நேரடியாக விவசாயிகளிடமிருந்து கொள்முதல் செய்து அவர்களுக்கு நியாயவிலை கிடைக்க உதவும் என்பது முதல் வாதம். இதன் மூலம் விவசாயிகள் பணக்காரர்களாகிவிடுவார்கள் என்பது அரசு மற்றும் சில்லறை விற்பனையில் அன்னிய முதலீட்டுக்காகக் குரல் எழுப்புபவர்களின் இன்னொரு வாதம். இப்படிச் சொல்கிறவர்கள் இந்தியாவின் கிராமப்புறங்களைப் பற்றிய புரிதல் இல்லாதவர்கள் என்பதுதான் நிஜம்.

பதினோராவது ஐந்தாண்டு திட்ட காலத்தில் (2007-12) வேளாண் பொருள்களைச் சந்தைப்படுத்தவும், அடித்தளக் கட்டமைப்பை உருவாக்கவும், உள்நாட்டு - வெளிநாட்டு வர்த்தகத்தைப் பெருக்கவும் தேவைப்படும் கொள்கைகளை வகுப்பதற்கான மத்திய திட்டக்குழுவின் செயல்திட்டக் குழு நாடாளுமன்றத்துக்கு அறிக்கை தயாரித்து அளித்தது.

அதேசமயம், உணவு, நுகர்வோர் விவகாரம், பொது விநியோகம் ஆகியவற்றுக்கான நாடாளுமன்ற உறுப்பினர்களைக் கொண்ட நிலைக்குழுவும் அரசுக்கு அறிக்கை அளித்தது. இவ்விரு அறிக்கைகளையும் சேர்த்துப் படித்தால் கிராமப்புற இந்தியா எப்படி இருக்கிறது என்ற உண்மை புலப்படும்.

இந்தியாவில் உள்ள விவசாயப் பண்ணைகளையும் வெளிநாடுகளில் உள்ள பண்ணைகளையும் ஒப்பிட்டுப் பார்த்தால்தான் உண்மை நிலவரம் புரியும்.

இந்தியாவில் சுமார் 588 லட்சம் சிறு, குறு விவசாயக் குடும்பங்கள் உள்ளன. அதாவது 32 கோடிக்கும் மேற்பட்ட கிராம மக்கள் இந்தியாவில் நிலங்களை நம்பி நேரடியாக வாழ்கின்றனர். சராசரியாக அவர்கள் வைத்திருக்கும் நிலத்தின் அளவு 5 ஸ்டாண்டர்டு ஏக்கர் அல்லது அதற்கும் கீழே.

வெளிநாடுகளின் நிலைமை அதுவல்ல. கனடா நாட்டில் சராசரியாக ஒரு விவசாயி வைத்திருப்பது 1,798 ஏக்கர். அமெரிக்காவில் இது 1,089 ஏக்கர், ஆஸ்திரேலியாவில் 17,975 ஏக்கர், பிரான்சில் 274 ஏக்கர், பிரிட்டனில் 432 ஏக்கர்.

அமெரிக்க விவசாயி வைத்திருக்கும் நிலத்தின் அளவு, இந்திய விவசாயி வைத்திருக்கும் நிலத்தின் அளவைப் போல 250 மடங்கு அதிகம். ஆஸ்திரேலியாவிலோ இது 4,000 மடங்கு அதிகம்! எனவே அமெரிக்காவிலும் இதர மேற்கத்திய நாடுகளிலும் பண்ணை வீட்டிலிருந்து சூப்பர் மார்க்கெட்டுக்கு வால்மார்ட் நிறுவனம் வாங்கிப்போகும் ""கொள்முதல் பாணி'' இந்தியாவுக்கு ஒத்துவராது என்பதை முதலில் புரிந்துகொள்ள வேண்டும்.

இந்தியாவில் கிராமங்களில் விளையும் உணவு தானியங்கள், காய்கறிகள், பழங்கள் போன்றவை எப்படி சந்தைக்கு வருகின்றன, எப்படி கிராமங்களிலேயே வாங்கி உண்ணப்படுகின்றன என்பது தெரியாமல், இந்தியாவில் மேலைநாட்டுக் கொள்முதல் பாணியை அறிமுகப்படுத்த நினைக்கிறார்கள்.

வால்மார்ட் போன்ற சூப்பர்மார்க்கெட் நிறுவனங்களை அனுமதித்தால் இடைத்தரகர்கள் ஒழிக்கப்பட்டுவிடுவார்கள் என்ற வாதம் சரியானதல்ல; இடைத் தரகர்கள் மட்டும் அல்ல, சிறு விவசாயிகளும் சேர்த்தே ஒழிக்கப்பட்டுவிடுவார்கள் என்பதுதான் உண்மை. அது மட்டும் அல்ல, வேறு எதையெல்லாம் அந்தக் "கொள்முதல் பாணி' ஒழிக்கும் என்பதைச் சொன்னால் அதிர்ச்சியாக இருக்கும்.

விவசாய வேலைகள் அனைத்துமே ஒப்பந்த அடிப்படையில் இனி மேற்கொள்ளப்படும். மிகப்பெரிய நிறுவனம்தான் ஆள்களை வேலைக்கு வைத்துக்கொள்ளும் அல்லது நீக்கும். பெரிய நிலப்பரப்பாக நிலங்கள் இணைக்கப்பட்டு இயந்திரங்கள் பெருமளவில் பயன்படுத்தப்படும். பாரம்பரிய விவசாயத் தொழிலாளர்கள் வேலை இழப்பார்கள்.

நிலங்களை அதிக பரப்பளவில் வைத்திருப்பவர்களால்தான் உற்பத்தியையும் உற்பத்தித் திறனையும் அதிகமாக வழங்க முடியும் என்பது உலக அளவிலான ஆய்வுகளின் முடிவு. ஆனால் இந்தியாவில் அதுவே தலைகீழாக இருக்கிறது.

மொத்த சாகுபடிப் பரப்பில் 34% நிலத்தை சிறு, குறு விவசாயிகள்தான் பயிர் செய்கின்றனர். ஆனால், நாட்டின் மொத்த உணவு தானிய உற்பத்தியில் இவர்களுடைய பங்களிப்பு 41% ஆக இருக்கிறது. அவர்களுடைய உற்பத்தித்திறன் மற்றவர்களைவிட 33% அதிகமாக இருக்கிறது.

சிறு நிலங்களையெல்லாம் சேர்த்து பெரு நிலப்பரப்புகளாகவும் பெரும் பண்ணைகளாகவும் மாற்றினால் உடனடியாக தேசிய உணவு உற்பத்தியில் 7% குறைந்துவிடும்! உணவு தானியம் மட்டும் அல்ல பால் உற்பத்தியும் அடியோடு பாதிக்கப்படும். கிராமப்புறங்களில் கிடைக்கும் 1,009 லட்சம் டன் பாலில் பெரும்பகுதிக்கு சிறு, குறு விவசாயிகள்தான் காரணம் என்பதை நாம் மறந்துவிடக்கூடாது.

கிராமப்புறங்களில் உள்ள மக்கள்தொகையில் பாதியைக் குறைக்காமல் சிறு, குறு விவசாயத்தை ஒழித்துவிட முடியாது. திட்டக்குழு நியமித்த செயல்திட்டக் குழு தனது அறிக்கையின் இறுதியில் இவ்வாறு தெரிவிக்கிறது: ""சிறு, குறு விவசாயிகள் இந்தியாவில் இன்னும் நெடுங்காலத்துக்கு இருக்கப் போவது நிச்சயம் - அதே சமயம் அவர்கள் ஏராளமான சோதனைகளை (அரசின் முடிவுகளால்தான்) சந்திக்கப் போவதும் நிச்சயம்; எனவே சிறு, குறு விவசாயிகளுக்கு என்ன நேரப் போகிறதோ அதைப் பொருத்துத்தான் கிராமப் பொருளாதாரத்தின் எதிர்காலமும் அமையும்''.

இதைவிட முக்கியம், சிறு - குறு விவசாயிகள் எதை உற்பத்தி செய்கிறார்கள், எதை உண்கிறார்கள், எதை மற்ற விவசாயத் தொழிலாளர்களுக்குக் கொடுக்கிறார்கள் என்பது. சிறு, குறு விவசாயிகளிடம் வியாபாரிகளுக்கு விற்பதற்காக உபரி உற்பத்தி ஏதும் இல்லை. இந்த நிலையில், வால்மார்ட் வகையறாக்கள் கிராமங்களில் நுழைந்தால், அவர்களுடைய உணவுப் பாதுகாப்பே பாதிக்கப்பட்டு விடும்.

கிராமப்புற இந்தியா குறித்து பெரும்பாலானவர்களுக்குத் தெரியாத உண்மை என்ன என்றால், இந்தியாவில் விளையும் உணவுப் பொருள்களில் 60%-க்கும் மேல் வியாபார ரீதியாக சந்தைக்கு வருவதில்லை, அவை கிராமங்களுக்குள்ளேயே விநியோகிக்கப்பட்டு உண்ணப்படுகிறது என்பது. சிறு விவசாயிகள் இவற்றைப் பாதுகாப்பாக வைத்திருக்கிறார்கள். தங்களுடைய நுகர்வுக்காகவும் தங்களிடம் உள்ள விவசாயத் தொழிலாளர்களுக்குக் கூலிக்குப் பதில் கொடுப்பதற்காகவும்தான் இதை இப்படிப் பாதுகாக்கிறார்கள்.

இது மனிதர்களுக்கு மட்டும் அல்ல, விவசாயிகளின் உற்ற நண்பர்களான கால்நடைகளுக்கும் கூட உணவாகப் பயன்படுகிறது. மிகவும் அவசியப்படும் நேரத்தில் கிராமத்தில் பிறருக்கும் விற்கப்படுகிறது.

இந்த 60 சதவீதத்தில் ஒரு சிறு பகுதியையாவது வால்மார்ட் நிறுவனம் கொள்முதல் செய்கிறது என்று வைத்துக் கொண்டாலும்கூட, ""நகர்ப்புற விலை நிர்ணயம்'' கிராமங்களிலும் நுழைகிறது என்று பொருள்.

நகரில் விற்கும் விலைக்கு கிராமங்களில் உள்ள சிறு, குறு விவசாயிகளும் நிலமற்ற விவசாயத் தொழிலாளர்களும் வாங்கிச் சாப்பிட முடியுமா?

அப்படியொரு நிலை வந்தால் கொங்கணப் பிரதேசத்தில் பரவலாக விளையும் அல்போன்சா ரக மாம்பழங்களுக்கு ஏற்பட்ட நிலையும் கேரளத்தில் மீன்களுக்கு ஏற்பட்ட நிலையும்தான் விவசாயத் தொழிலாளர்களுக்கும் ஏழைகளுக்கும் ஏற்படும்.

இப்போதெல்லாம், அல்போன்சா ரக மாம்பழங்களைக் கண்ணால்தான் கொங்கணப் பகுதி மக்கள் பார்க்கின்றனரே தவிர சாப்பிடுவதில்லை. ஏற்றுமதிக்கே அனைத்தையும் கொடுத்துவிட்டு கிடைக்கும் ரூபாயில் நகர்ப்புறங்களிலிருந்து தங்களுக்கு வேண்டியதை வாங்கிக் கொள்கின்றனர்.

கேரள மீனவர்கள் மீன்களை அதிக விலைக்கு ஏற்றுமதி செய்துவிட்டு கிடைக்கும் பணத்தில் வெளிநாட்டு மதுரகங்களை வாங்கிச் சாப்பிடுகின்றனர். காரணம், சொந்த ஊரில் யாருக்கும் அந்த மீன் மலிவு விலையில் கிடைப்பதில்லை.

சில்லறை விற்பனையில் அன்னிய நேரடி முதலீடு என்பது சிறு, குறு விவசாயிகளின் உணவுப் பாதுகாப்பை இப்படித்தான் ஆபத்தில் ஆழ்த்துகிறது. இந்திய மக்கள்தொகையில் மூன்றில் இரு மடங்கு என்று கருதப்படும் விவசாயத் தொழிலாளர்களுக்கு, அவர்கள் விளைவிக்கும் பொருள்களே கிடைக்காத நிலையும் அதிக விலை கொடுத்துத்தான் சூப்பர் மார்க்கெட்டுகளில் வாங்க வேண்டும் என்ற நிலையும் ஏற்படும்!

இது ஒருபுறம் இருக்க எஞ்சிய 40% உணவு தானியங்கள் எப்படி கிராமங்களிலும் பிற பகுதிகளிலும் விற்பனைக்குக் கிடைக்கின்றன? எஞ்சியுள்ள 40% உணவு தானியங்களில் சுமார் 35% அளவு, அதாவது பத்து டன்களில் 9 டன் அளவுக்கு தினசரி, வார கிராமச் சந்தைகள், திருவிழாச் சந்தைகள் மூலம்தான் விற்கப்படுகின்றன.

கிராமங்களில் நடைபெறும் சந்தைகளின் எண்ணிக்கை மட்டும் 47,000. எஞ்சிய 5% உணவு தானியங்கள் மட்டுமே அரசின் கண்காணிப்பில் செயல்படும் 6,359 மொத்தவிலை மண்டிகளுக்கு விற்பனைக்கு வருகின்றன.

இந்த இடத்தில்தான் நாட்டின் உபரி உணவு தானிய உற்பத்தி நவீனச் சந்தை அமைப்பு மூலம் விற்கப்படுகிறது. இந்த உணவு தானியத்தைத்தான் அரசு பொது விநியோகத்துக்காக வாங்கி, பத்திரப்படுத்துகிறது. மொத்த விளைச்சலில் எந்த அளவுக்கு பொதுச் சந்தைக்கு வருகிறது என்று பாருங்கள்.

வார, தினச் சந்தைகள் எப்படிச் செயல்படுகின்றன? முக்கால்வாசிச் சந்தைகள் வாரத்தில் ஒரு முறை கூடுகின்றன. ஐந்தில் ஒரு பகுதி வாரத்தில் இருமுறை கூடுகின்றன. இருபதில் ஒரு மடங்கு தினசரி கூடுகின்றன.

ஒரு சந்தை, சுமார் 14 கிராமங்களுக்குப் பொருள்களை விற்கிறது. எல்லாச் சந்தைகளும் சேர்ந்து 6.58 லட்சம் இந்தியக் கிராமங்களுக்குத் தேவைப்படும் உணவு தானியங்களையும் இதர வேளாண் பொருள்களையும் விற்கின்றன.

மூன்றில் இரு மடங்கு சந்தைகள் கிராமங்களிலிருந்து அதிகபட்சம் 16 கிலோ மீட்டர் தொலைவில் நடக்கின்றன. நாலில் ஒரு பகுதி சந்தைகள் 6 கிலோ மீட்டர் முதல் 15 கிலோ மீட்டர் தொலைவுக்குள் நடைபெறுகின்றன. பத்தில் ஒரு பகுதி சந்தைகள் 5 கிலோமீட்டர் தொலைவுக்குள் நடக்கின்றன.

மூன்றில் இரு மடங்குக்கும் மேற்பட்ட மக்கள், சந்தைகளுக்கு நடந்து சென்றே பொருள்களை வாங்குகின்றனர். மூன்றில் ஒரு பங்கு மக்கள் சைக்கிளில் சென்று வாங்குகின்றனர். மற்றவர்கள் மாட்டு வண்டிகளிலும், மோட்டார் பொருத்தப்பட்ட வாகனங்களிலும் வந்து வாங்குகின்றனர்.

இந்த சந்தைகளுக்கு வரும் மக்கள் வெறும் சரக்குகளை வாங்கிப் போக மட்டும் வருவதில்லை. சமூக, கலாசார பரிவர்த்தனைகளுக்காகவும் வருகின்றனர்.

இங்குதான் கொடுக்கல், வாங்கல் பிரச்னைகள் பேசித்தீர்க்கப்படுகின்றன. வாய்க்கால் வரப்பு தகராறுகளும் சுமுகமாக முடிகின்றன. தங்கள் வீட்டுப் பிள்ளைகளுக்கும் பெண்களுக்கும் இங்கேயே வரன் பார்ப்பதும் உண்டு. வீடு வாங்குவது, வாகனம் வாங்குவது போன்ற விஷயங்களையும் இங்கேயே பேசி முடிக்கின்றனர்.

கால்நடைகளை வாங்குவது விற்பது, அவற்றுக்குத்தேவையான உணவு, மருந்து ஆகியவற்றை வாங்குவது போன்றவற்றுக்கும், உழவுக்கருவிகள் வாங்கவும் இந்த சந்தைகளைத்தான் பயன்படுத்துகின்றனர்.

பாத்திரங்களுக்குக் கலாய் பூசுவது, விவசாயக் கருவிகளைப் பழுதுபார்ப்பது, கைப்பிடி போடுவது, சாணை பிடிப்பது என்று எல்லாமே இந்தச் சந்தைகளில்தான்.

அடுத்து என்ன பயிர்ச் சாகுபடி செய்யலாம், அதற்குத் தேவைப்படும் பணத்துக்கு என்ன செய்யலாம் என்றுகூட இங்குதான் பேசி முடிவு செய்கின்றனர்.

விவசாயிகள் அடுத்து என்ன செய்ய வேண்டும் அல்லது செய்யக்கூடாது என்று தங்கள் அலுவலகங்களுக்கு வந்து கேட்க வேண்டும் என்று கூறாமல் அரசே இந்த சந்தைகளுக்குச் சென்று விவசாயிகளைச் சந்தித்துத் தகவல்களைப் பரிமாறிக் கொள்ள வேண்டும் என்று திட்டக் கமிஷனின் செயல்திட்டக்குழு பரிந்துரை செய்துள்ளது.

திட்டக்கமிஷனின் செயல்திட்டக்குழு தங்களைப் போகச் சொன்ன இடத்துக்கு, வால்மார்ட் போன்ற அன்னிய நிறுவனங்கள் போக வேண்டும் என்று எதிர்பார்க்கிறது இந்திய அரசு.

கிராமப்புற இந்தியா, மத்திய அரசிடமிருந்து அந்த அளவுக்கு அன்னியப்பட்டுப் போயிருக்கிறது. அரசு அறிவிக்கும் குறைந்தபட்ச ஆதரவு விலை என்ன என்று நாட்டின் விவசாயிகளில் 70 சதவீதம் பேர் இன்னமும் கேள்விப்பட்டதுகூட இல்லை என்று தேசிய சாம்பிள் சர்வே (என்.எஸ்.எஸ்.) அமைப்பு தெரிவிக்கிறது.

அப்படி அதைக் கேள்விப்பட்ட 30 சதவீதம் பேரிலும் 81 சதவீதம் பேருக்கு அதை எப்படிப் பயன்படுத்திக் கொள்வது என்று தெரியவில்லையாம். காரணம், குறைந்தபட்ச ஆதரவு விலை என்பது அரசு நடத்தும் கொள்முதல் நிலையங்களில்தான் அமலில் இருக்கிறதே தவிர, விவசாயிகளுக்கு நன்கு பரிச்சயமான சந்தைகளில் அல்ல.

எனவேதான், குறைந்தபட்ச ஆதரவு விலை என்றாலே என்னவென்று தெரியாத விவசாயிகள், எதிர்கால சந்தையை எப்படித் தங்கள் நலனுக்கேற்ப பயன்படுத்திக் கொள்வார்கள் என்று நாடாளுமன்ற நிலைக்குழு சரியாகவே கேட்டிருக்கிறது.

இதற்குப் பதில் சொல்ல முடியாத அரசு, உணவு தானியத்தில் ""எதிர்காலத்துக்கான ஊக பேரம் கூடாது'' என்று மட்டும் தடை செய்திருக்கிறது, அவ்வளவே. அந்த லட்சணத்தில்தான் இருக்கிறது நமது மத்திய ஆட்சியாளர்களின் இந்திய கிராமங்கள் பற்றிய நுண்ணறிவு. என்ன செய்வது மண்ணின் மணம் தெரியாமல் ஹார்வேர்ட், ஆக்ஸ்போர்ட் பல்கலைக்கழகங்களில் படித்துவிட்டு வந்த பொருளாதார நிபுணர்களின் திட்டமிடலின் லட்சணம் அப்படி.

பின்குறிப்பு: சில்லறை வர்த்தகத்தில் அன்னிய நேரடி முதலீட்டை அனுமதிப்பது என்ற முடிவால் பாரம்பரியமாக சமுதாய மக்களால் நடத்தப்படும் 12 லட்சம் சில்லறைக் கடைகளை ஆபத்தில் ஆழ்த்தியிருக்கிறது மத்திய அரசு; அது மட்டும் அல்ல, கிராமப்புற உணவுப் பாதுகாப்பு வளையத்தையும் ஆபத்தில் சிக்க வைத்திருக்கிறது. 2012-ம் ஆண்டு தொடங்கி எதிர்வரும் காலத்துக்கு ஐக்கிய முன்னணி அரசு இந்த நாட்டுக்கு அளித்திருக்கும் கொடை இதுதான்!

நன்றி: தினமணி.

சென்னைக்கு அழகு சேர்க்கபோகும் மெட்ரோ ரயில். படங்கள் இணைப்பு.

2011-11-23T19:56:00.002+05:30

எம்எம்டிஏ சிக்னல் அருகில்

சென்னையில் திரும்பிய திசையெல்லாம் போக்குவரத்து நெரிசல் முழி பிதுங்கி கிடக்கிறது. நகரின் அனைத்து பாகங்களிலும் பெரிய பெரிய தூண்களும், டைனோசர் சைசுக்கு இருக்கும் கிரேன்களும் பிரம்மாண்டமாய் எழுந்து நின்று நம்மை பயமூட்டுகின்றன. மெட்ரோ ரயில் திட்டப் பணிகள் நகரின் அனைத்து பகுதிகளிலும் தங்கு தடையின்றி நடைபெற்று வருவதால் சென்னை முழுவதுமே போக்குவரத்து ஆமை வேகத்தில்தான் நடந்து வருகிறது.

பொறுமைசாலிகளான சென்னை வாசிகள், இன்றைய சிரமம் நாளைய வசதிக்காக என்று இந்த சிரமத்தை பொறுத்துக் கொண்டு உள்ளனர்.

சென்னையின் நாளைய அடையாளமாய் மாறப்போகும் மெட்ரோ ரயில் திட்டப் பணிகளைப் பற்றிய நான் எடுத்த புகைபடங்களும் சில விபரத் துளிகளும்.....

பிரமாண்டமான தூண்கள்!

இணைப்புக் கிராதி

இனி கோயம்பேடு பேருந்து நிலையதிற்குள்ளேயே... ரயில் வரும்!

சென்னையின் போக்குவரத்து நெரிசலை குறைக்கும் வகையில் முந்தையை திமுக அரசு கொண்டு வந்ததுதான் இந்த மெட்ரோ ரயில் திட்டம்.

சுமார் ரூ.14,600 கோடி இந்த மெட்ரோ ரயில் திட்டப் பணிகளுக்கு ஒதுக்கீடு செய்யப்பட்டன.

துணை முதல்வர் ஸ்டாலின் இத் திட்டத்தை துவக்கி வைத்தார்.

இத்திட்டம் 2014ம் ஆண்டில் முடிவடைந்து ரயில் ஓடத் துவங்கும்.

இதற்கான முயற்சிகள் 2006ம் ஆண்டு முதல் மேற்கொள்ளப்பட்டன.

2006 ஜூன் மாதத்தில் தமிழக அமைச்சரவை இந்த தி்ட்டத்துக்கு ஒப்புதல் வழங்கியது.

நீண்டு செல்கிறது பாலம்

இத்திட்டத்தின் மொத்த செலவு ரூ.14,600 கோடி. இதில் 41 சதவீதத்தை மத்திய, மாநில அரசுகள் வழங்கும். மீதித் தொகையை ஜப்பான் அரசு ( Japan International Cooperation Agency (JICA)) கடனாக வழங்குகிறது.

-படங்களும் செய்திகளும் தொடரும்.

ஃபாத்திமா பாபு எழுதிய (அந்தமாதிரி) கவிதை?

2011-11-13T20:35:00.002+05:30

இது நாள் வரையில் ஃபாத்திமா பாபுவை எல்லோருக்கும் செய்தி வாசிப்பாளர் மற்றும் நடிகை என்றுதான் தெரியும். அவர் கவிதை எழுதத் தெரிந்த ஓவியம் வரையத் தெரிந்த பன்முகத் திறன் படைத்தவர் என்பது நம்மில் அனேகம் பேருக்குத் தெரியாது.

அவர் எழுதிய கவிதை ஒன்றை அவரது முக நூலில் வெளியீட்டிருந்தார்.எந்த மாதம் என்று நினைவில்லை. கவிதையை படித்ததும் அப்படியே பிரமித்துவிட்டேன். நல்ல வார்த்தை வார்ப்புகள்.

இதைபோன்ற கவிதைகளை எழுத நிறைய துணிச்சல் வேண்டும். அது அவரிடம் நிறையவே இருக்கிறது. வாழ்த்துகள் ஃபாத்திமா பாபு.

"இயங்கிக் களைத்த போது.....!"

முலைகளில் படரும் கரங்களின்

காட்டம் பொறுத்து

காதுகளில் வெடிக்கும் முத்தத்தின்

சப்தம் சகித்து

உதடுகளில் பதியும் பற்களின்

ரணம் பொறுத்து

ஈரமாகும் முன் இறுகிப் பாயும்

குறியின் வலி பொறுத்து.....

இயங்கிக் களைத்த அவன்

கழுவி வெளிவரும் முன்

கசிவுகளின் பிசுபிசுப்பினூடே

விரல்களின் விரைந்த இயக்கத்தில்

துரித பயணம் ஒன்று - .....

மிச்சமான உச்சம் நோக்கி.

- ஃபாத்திமா பாபு .

பின் குறிப்பு:

ஃபாத்திமா பாபு அவர்களின் அனுமதியின்றி இக் கவிதையை பிரசுரித்திருக்கின்றேன். ஃபாத்திமா பாபு அவர்களுக்கு எனது நன்றிகள் பல.....!

தி ஹிண்டுவை வம்பிக்கிழுக்கும் டைம்ஸ் ஆஃப் இந்தியா விளம்பரம்.

2011-11-13T00:01:00.002+05:30

தி டைம்ஸ் ஆஃப் இந்தியா நாளிதழ் வெளியீட்ட விளம்பரம் 'தி இந்து' நாளிதழை பகிரங்கமாக சண்டைக்கு இழுத்துள்ளது.

சமீப காலமாக தமிழ் நாட்டில் ஆங்கில பத்திரிகைகளிடையே 'யார் பெரியவன்' என்ற போட்டி கடுமையாக எழுந்துள்ளது.

அது நாள் வரையில் தி நியூ இந்தியன் எக்ஸ்பிரஸ் மற்றும் தி ஹிண்டு ஆங்கில நாளிதழ்கள் மட்டுமே தமிழ் நாட்டில் கோலோச்சிவந்தன. 2005ம் ஆண்டு டெக்கான் கிரானிக்கலும், 2008ம் ஆண்டு ஏப்ரல் தமிழ் வருடப் பிறப்பு அன்று 'தி டைம்ஸ் ஆஃப் இந்தியாவும்' சென்னையில் தொடங்கப்பட்டன. அன்றிலிருந்து சென்னை பத்திரிகை உலகில் பரப்பரப்புத் தொற்றிக் கொண்டது.

சென்னையோடு மும்பையை ஒப்பிடும் போது, மும்பையில் நாளிதழ்கள் அதிகம். ஆனால் சென்னையில் அப்படி அல்ல. இங்கு ஆங்கில காலை நாளிதழ்கள் நான்கும், தமிழில் காலை நாளிதழ்கள் நான்கும், மொத்தம் 8 நாளிதழ்கள் மட்டுமே முக்கிய இடத்தில் உள்ளன. சென்னையிலிருந்து இருந்து வெளியாகும் தி நியூ இந்தியன் எக்ஸ்பிரஸ் மற்றும் தி இந்து நாளிதழ்கள் தமிழர் கலாச்சாரத்தை மையமாகக் கொண்டே செய்திகளை வழங்கி வருகின்றன.

நகரின் பல பாகங்களில் ஐடி நிறுவனங்கள் திறக்கப்பட்டு, கடந்த 10 வருடத்தில் சென்னை பல்வேறு துறைகளில் வியப்புக்குறிய வகையில் முன்னேறி வருகிறது. ஆங்கில கலாச்சாரத்தின் தாக்கம், தமிழக மண்ணில் அதி விரைவாக பரவிவருகிறது. இதன் அளப்பரிய வியாபார வாய்ப்பு சென்னையின் கதவுகளை சர்வதேச அளவில் திறந்துவிட்டுள்ளது.

இந்த காலக் கட்டத்தில் சென்னையில் காலுன்றிய தி டெக்கான் கிரானிக்கல் மற்றும் தி டைம்ஸ் ஆஃப் இந்தியா நாளிதழ்கள், தி நியூ இந்தியன் எக்ஸ்பிரஸ் மற்றும் தி இந்துவை ஓரங்கட்டிவிடலாம் என்று எளிதாக கணக்கு போட்டன,   அவைகளுக்கு கிடைத்த வரவேற்பைப் பார்த்தவுடன் நமக்கும் அப்படித்தான் தோன்றியது.

தி டெக்கான் கிரானிகல் சொல்லிக் கொள்ளும் அளவில் விற்பனை ஆனாலும், அதன் விளம்பர வாய்ப்புகள் அப்படி ஒன்றும் பெரிதாக இல்லை.

ஆனால் தி டைம்ஸ் ஆஃப் இந்தியாவின் நிலையோ வேறு. இந்தியா முழுவதும் பலமான நெட்வொர்க் உள்ள அந்த பத்திரிகை யாரையும் எதையும் வலைக்கும் ஆற்றல் படைத்தது. விளம்பரம் மற்றும் விற்பனைக்காக எந்த ஒரு நிலைக்கும் தன்னை ஆட்படுத்திக் கொள்ளக் கூடியது.

எக்ஸ்பிரஸ் மற்றும் இந்து நாளிதழ்கள் நினைத்துப் பார்க்காத பரீச்சார்த்திரமான முயற்சிகளை கையாள்வதில் டைம்ஸ் எப்போதுமே முன்னனியில் இருக்கிறது. சென்னையில் லான்ச் ஆனபோதே தமிழில் விளம்பரம் வெளியீட்டு ஆங்கில பத்திரிகைக்கு தமிழில் விளம்பரமா? என்று புருவம் உயரச்செய்தது.

இன் நிலையில் இந்த (நவம்பர்) மாதத் தொடக்கத்தில் டைம்ஸ் வெளியீட்ட விளம்பரம், பெரும் பரப்பரப்பை ஏற்படுத்தியுள்ளது.   ஒரு ஆள் வேஷ்ட்டி சட்டை அணிந்துக் கொண்டு, கையில் ஒரு நாளிதழை வைத்துக் கொண்டு பார்க்கும் இடத்தில் எல்லாம் தூங்கிக்கொண்டு இருக்கிறான்.

ஒரு கட்டிடத் திறப்பு விழாவின் போது, விருந்தினர் ரிப்பன் வெட்ட, அருகில் தூங்கிக் கொண்டு இருக்கிறான். விளம்பரத்தைக் காண இங்கே சொடுக்கவும்

பளுதூக்கும் வீரர்கள் இருக்கும் சபையில் தூங்கிக்கொண்டு இருப்பான்.

மக்கள் லாரியில் தண்ணீர் பிடித்துக் கொண்டு இருக்கும் போது அங்கு அமர்ந்து தூங்கிக் கொண்டு இருக்கிறான்.

காவல் துறை அணிவகுப்பின் போதும்...ஓட்டு சேகரிக்கும் போதும்.... என்று பார்க்கும் இடத்தில் எல்லாம் அவனது தூக்கம் தொடர்கிறது.

இந்த விளம்பரங்கள் ஓடும் போது பின்னணியில் ஒரு பெண் குரல் கிழ்கண்டவாறு பாடுகிறது.

ஏ....ஆராரோ ஆரிரரோ......
எங்கண்ணே ஆராரோ ஆரிரரோ......
குறிஞ்சி மலைத்தேனே கொண்டாடும் சந்தனமே.....
சரிஞ்சி படுத்திருக்கும் சென்பகமே கண் உறங்கு. (ஆஆ....)
நிலவே தூங்கும் வேள...நீயேன் தூங்கவில்லை
நிலவே தூங்கும் வேள...நீயேன் தூங்கவில்லை
ஆற்றங்கரை காற்றினிலே அன்பே கண் உறங்கு.....   (ஆஆ.....)
ஆற்றங்கரை காற்றினிலே அன்பே கண் உறங்கு

பின்பு இறுதியில்

STUCK WITH NEWS

THAT PUTS YOU

TO SLEEP?

என்ற வாசகத்தோடு அந்த விளம்பரம் முடிகிறது.

இதில் எங்கே பிரச்சனை இருக்கிறது என்று நீங்கள் கேட்கலாம்?. அந்த தூங்கும் மனிதன் தனது கையில் தி இந்து நாளிதழைதான் மடித்து வைத்திருக்கிறான், என்பது கடைசி காட்சியில் மிகத் தெளிவாக தெரிகிறது.

'சவ சவன்னு தூக்கம் வரவழைக்கும் செய்திகளைத் தரும் இந்து நாளிதழ், இனி ஒரேடியாகத் தூங்கட்டும்' என்ற பொருள் வரும்படி, அந்த விளம்பரம் உள்ளதாக விளம்பர நிபுணர்கள் கருத்துத் தெரிவிக்கிறனர்.

இதற்கு இந்துவின் பதில் என்ன....?

என்னை உற்றுப்பாருங்கள்....!

2011-11-11T15:21:00.000+05:30

சும்மா ஒரு தமாசு.....!?